પ્રધાનમંત્રી મોદીએ ફૂડ પ્રોસેસિંગ ક્ષેત્રમાં થયેલા ફેરફારોને મહત્ત્વપૂર્ણ ગણાવ્યા

પ્રધાનમંત્રી નરેન્દ્ર મોદીએ આજે મંગળવારે ભારતના ખાદ્ય પ્રસંસ્કરણ ક્ષેત્રમાં તાજેતરના વર્ષોમાં થયેલા જબરદસ્ત ફેરફારોની ચર્ચા કરી છે. તેમણે ખાસ કરીને આ ક્ષેત્રની ઝડપી પ્રગતિ અને ગ્રામીણ વિકાસમાં તેના વધતા યોગદાન પર પ્રકાશ પાડ્યો છે. પ્રધાનમંત્રીએ સોશિયલ મીડિયા પ્લેટફોર્મ 'X' પર કેન્દ્રીય ખાદ્ય પ્રસંસ્કરણ ઉદ્યોગ મંત્રી ચિરાગ પાસવાનની એક પોસ્ટ શેર કરીને પોતાની પ્રતિક્રિયા આપી છે. ચિરાગ પાસવાને પોતાની પોસ્ટમાં આ ક્ષેત્રના ગતિશીલ વિકાસ અને સરકારની યોજનાઓની અસર દર્શાવી, જેણે ગ્રામીણ ઉદ્યોગસાહસિકોને નવી દિશા આપી છે.

પોતાના પ્રતિભાવમાં, પીએમ મોદીએ લખ્યું, 'કેન્દ્રીય મંત્રી ચિરાગ પાસવાને ભારતના ફૂડ પ્રોસેસિંગ ક્ષેત્રમાં વર્ષોથી જોવા મળેલા અદ્ભુત પરિવર્તન પર પ્રકાશ પાડ્યો છે. તે એક ગતિશીલ અભિગમ છે, જેણે ગ્રામીણ ઉદ્યોગસાહસિકોને સશક્ત બનાવ્યા છે. માહિતીપ્રદ લેખ પર એક નજર નાખો'

ઉલ્લેખનિય છે કે, તાજેતરના વર્ષોમાં ભારતના ફૂડ પ્રોસેસિંગ ક્ષેત્રે ઝડપથી વિકાસ કર્યો છે. તેની પાછળના મુખ્ય કારણોમાં મજબૂત સરકારી નીતિ સમર્થન, લક્ષિત રોકાણ, માળખાગત સુવિધાઓનું આધુનિકીકરણ, સપ્લાય ચેઇનને મજબૂત બનાવવી અને નવીનતાને પ્રોત્સાહન આપવા જેવી પહેલો શામેલ છે. આ પ્રયાસોએ માત્ર ઉદ્યોગને વેગ આપ્યો નથી, પરંતુ ગ્રામીણ ભારતમાં ઉદ્યોગસાહસિકતાને પ્રોત્સાહન આપીને લાખો લોકોને આજીવિકાની નવી તકો પણ પૂરી પાડી છે.