પ્રધાનમંત્રી મોદીએ હૈદરાબાદ હાઉસ ખાતે કતારના અમીર સાથે બેઠક કરી, મહત્વપૂર્ણ મુદ્દાઓ પર કરાર

પ્રધાનમંત્રી નરેન્દ્ર મોદીએ મંગળવારે નવી દિલ્હીના હૈદરાબાદ હાઉસ ખાતે કતારના અમીર તમિમ બિન હમાદ અલ થાની સાથે બેઠક કરી હતી, જ્યાં બંને નેતાઓએ પ્રતિનિધિમંડળ સ્તરની વાતચીત કરી. પ્રધાનમંત્રી નરેન્દ્ર મોદીએ વિદેશ મંત્રી એસ જયશંકર, નાણામંત્રી નિર્મલા સીતારમણ અને અનેક વરિષ્ઠ મંત્રીઓ સાથે વાટાઘાટોનું નેતૃત્વ કર્યું. કતારના પ્રતિનિધિમંડળનું નેતૃત્વ અમીર તમિમ બિન હમાદ અલ થાનીએ કર્યું હતું.

ભારત અને કતાર વચ્ચે આવક પરના કરવેરા સંદર્ભે બેવડા કરવેરા ટાળવા અને નાણાકીય ચોરી અટકાવવા માટેના સુધારેલા કરાર પર દિલ્હીના હૈદરાબાદ હાઉસ ખાતે પ્રધાનમંત્રી મોદી અને કતારના અમીર શેખ તમિમ બિન હમદ અલ થાનીની હાજરીમાં હસ્તાક્ષર કરવામાં આવ્યા હતા.

આ દરમિયાન, બંને નેતાઓએ ભારત-કતાર સંબંધોને વ્યૂહાત્મક ભાગીદારી સુધી વધારવાનો નિર્ણય કર્યો, જેમાં વેપાર, ઊર્જા, રોકાણ, નવીનતા, ટેકનોલોજી, ખાદ્ય સુરક્ષા, સંસ્કૃતિ અને લોકો-થી-લોકોના સંબંધો પર ધ્યાન કેન્દ્રિત કરવામાં આવ્યું. તેમણે પરસ્પર હિતના પ્રાદેશિક અને વૈશ્વિક મુદ્દાઓ પર પણ વિચારોનું આદાન-પ્રદાન કર્યું.

કતારના અમીર તમિમ બિન હમાદ અલ થાની બે દિવસની રાજ્ય મુલાકાતે ભારત પહોંચ્યા છે. મંગળવારે રાષ્ટ્રપતિ ભવનના પરિસરમાં અમીરને ગાર્ડ ઓફ ઓનર આપવામાં આવ્યું અને ઔપચારિક સ્વાગત કરવામાં આવ્યું. રાષ્ટ્રપતિ દ્રૌપદી મુર્મુ અને પીએમ નરેન્દ્ર મોદી સહિત સરકારના વરિષ્ઠ મંત્રીઓએ તેમનું સ્વાગત કર્યું. કતારના અમીરે પણ મંત્રીઓ સાથે વાતચીત કરી હતી. તેમની સાથે મંત્રીઓ, વરિષ્ઠ અધિકારીઓ અને વ્યાપારી પ્રતિનિધિમંડળનો સમાવેશ થતો ઉચ્ચ સ્તરીય પ્રતિનિધિમંડળ હતો. આ પહેલા, તેઓ માર્ચ 2015 માં ભારતની રાજ્ય મુલાકાતે આવ્યા હતા.

ગઈકાલે સોમવારે રાષ્ટ્રીય રાજધાનીના પાલમ ટેકનિકલ એરપોર્ટ પર પીએમ મોદીએ કતારના અમીર શેખ તમીમ બિન હમદ અલ થાનીનું સ્વાગત કર્યું. તેમણે કતારના અમીરને પોતાના ભાઈ ગણાવ્યા અને ભારતમાં તેમના સફળ રોકાણની શુભેચ્છા પાઠવી. રાષ્ટ્રીય રાજધાની પહોંચ્યા બાદ વિદેશ મંત્રી એસ જયશંકરે કતારના અમીરને મળ્યા.

ભારત અને કતાર વચ્ચે મિત્રતા, વિશ્વાસ અને પરસ્પર આદરના ઊંડા ઐતિહાસિક સંબંધો છે. વિદેશ મંત્રાલયના જણાવ્યા અનુસાર, તાજેતરના વર્ષોમાં, બંને દેશો વચ્ચેના સંબંધો સતત મજબૂત થયા છે, જેમાં વેપાર, રોકાણ, ઊર્જા, ટેકનોલોજી, સંસ્કૃતિ અને લોકો વચ્ચેના સંબંધોનો સમાવેશ થાય છે.

કતારમાં ભારતીય સમુદાય કતારમાં સૌથી મોટો વિદેશી સમુદાય છે અને કતારની પ્રગતિ અને વિકાસમાં તેમના સકારાત્મક યોગદાન બદલ પ્રશંસા કરવામાં આવે છે. કતારના અમીરની મુલાકાત બંને દેશો વચ્ચે વધતી જતી બહુપક્ષીય ભાગીદારીને વધુ વેગ આપશે.