પ્રધાનમંત્રી મોદી અને જર્મન ચાન્સેલર ફ્રેડરિક મેર્ઝ વચ્ચે વાતચીત, બંને નેતાઓએ તમામ પ્રકારના આતંકવાદ સામે લડવાની પ્રતિબદ્ધતાનો કર્યો પુનરોચ્ચાર

પ્રધાનમંત્રી નરેન્દ્ર મોદીએ મંગળવારે જર્મનીના ચાન્સેલર ફ્રેડરિક મેર્ઝ સાથે ટેલિફોન પર વાત કરી અને તેમને જર્મનીના ચાન્સેલર તરીકેનો કાર્યભાર સંભાળવા બદલ અભિનંદન પાઠવ્યા. આ દરમિયાન, બંને દેશોના નેતાઓએ ભારત-જર્મની વ્યૂહાત્મક ભાગીદારીને વધુ મજબૂત બનાવવાના માર્ગો પર ચર્ચા કરી. તેમણે પરસ્પર હિતના પ્રાદેશિક અને વૈશ્વિક મુદ્દાઓ પર પણ ચર્ચા કરી હતી . 

બંને દેશોએ આતંકવાદ સામે લડવામાં એકતા જાળવવાની પ્રતિબદ્ધતા વ્યક્ત કરી. આ સંદર્ભમાં, વિદેશ મંત્રાલયે કહ્યું કે ટેલિફોન વાતચીતમાં, બંને નેતાઓએ તમામ પ્રકારના આતંકવાદનો સામનો કરવાનો સંકલ્પ કર્યો.આ અંગે પ્રધાનમંત્રી  મોદીએ સોશિયલ મીડિયા પોસ્ટમાં કહ્યું કે તેમણે ફ્રેડરિક મેર્ઝને જર્મનીના ચાન્સેલર બનવા બદલ અભિનંદન આપ્યા અને બંને દેશો વચ્ચે વ્યૂહાત્મક ભાગીદારીને વધુ મજબૂત બનાવવાની પ્રતિબદ્ધતાનો પુનરોચ્ચાર કર્યો.

છેલ્લા 25 વર્ષોમાં ભારત-જર્મની વ્યૂહાત્મક ભાગીદારીમાં થયેલી ઉત્કૃષ્ટ પ્રગતિની નોંધ લેતા, બંને નેતાઓ વેપાર અને રોકાણ, સંરક્ષણ અને સુરક્ષા, અને નવીનતા અને ટેકનોલોજીના ક્ષેત્રો સહિત દ્વિપક્ષીય સંબંધોને વધુ મજબૂત બનાવવા માટે સાથે મળીને કામ કરવા સંમત થયા. બંને નેતાઓએ જર્મનીમાં ભારતીય ડાયસ્પોરા દ્વારા આપવામાં આવેલા સકારાત્મક યોગદાનની નોંધ લીધી.વિદેશ મંત્રાલયે જણાવ્યું હતું કે બંને નેતાઓ વચ્ચેની વાતચીતમાં જર્મનીમાં ભારતીય મૂળના લોકોના સકારાત્મક યોગદાનનો ઉલ્લેખ કરવામાં આવ્યો હતો. પ્રધાનમંત્રી મોદીએ ચાન્સેલર મેર્ઝને ભારતની મુલાકાત લેવા આમંત્રણ પણ આપ્યું.