પ્રધાનમંત્રી મોદી રૂ. 36,230 કરોડના ગંગા એક્સપ્રેસ-વેનું ઉદ્ઘાટન કરશે

પ્રધાનમંત્રી નરેન્દ્ર મોદી બુધવારે વારાણસીમાં શ્રી કાશી વિશ્વનાથ મંદિરમાં પૂજા-અર્ચના કરશે, ત્યારબાદ તેઓ હરદોઈ જવા રવાના થશે. હરદોઈમાં તેઓ રૂ. 36,230 કરોડના ખર્ચે બનેલા 594 કિમી લાંબા ગંગા એક્સપ્રેસવેનું ઉદ્ઘાટન કરશે.

સત્તાવાર નિવેદન મુજબ, પ્રધાનમંત્રી સવારે આશરે 8:30 વાગ્યે શ્રી કાશી વિશ્વનાથ મંદિરમાં દર્શન અને પૂજા કરશે. ત્યારબાદ, તેઓ હરદોઈની યાત્રા કરશે અને સવારે લગભગ 11:30 વાગ્યે ગંગા એક્સપ્રેસવેનું ઉદ્ઘાટન કરશે. તેઓ એક જનસભાને પણ સંબોધિત કરશે.

ગંગા એક્સપ્રેસવેનું ઉદ્ઘાટન દેશમાં વિશ્વસ્તરીય માળખાગત સુવિધાઓના વિકાસમાં એક મહત્વપૂર્ણ સીમાચિહ્ન સાબિત થશે. તે 594 કિમી લાંબો, 6-લેન વાળો, એક્સેસ-કંટ્રોલ ગ્રીનફીલ્ડ કોરિડોર છે.

આ એક્સપ્રેસવે 12 જિલ્લાઓ: મેરઠ, બુલંદશહેર, હાપુડ, અમરોહા, સંભલ, બદાઉં, શાહજહાંપુર, હરદોઈ, ઉન્નાવ, રાયબરેલી, પ્રતાપગઢ અને પ્રયાગરાજમાંથી પસાર થાય છે. આ રીતે તે ઉત્તર પ્રદેશના પશ્ચિમ, મધ્ય અને પૂર્વીય વિસ્તારોને એક જ હાઈ-સ્પીડ કોરિડોર દ્વારા જોડે છે.

આ પ્રોજેક્ટથી મેરઠ અને પ્રયાગરાજ વચ્ચે મુસાફરીનો સમય ઘણો ઓછો થશે. હાલમાં લાગતા 10-12 કલાકને બદલે હવે માત્ર 6 કલાકમાં મુસાફરી પૂર્ણ કરી શકાશે.

એક મુખ્ય વિશેષતા શાહજહાંપુરમાં 3.5 કિમી લાંબી ઈમરજન્સી લેન્ડિંગ સુવિધા (એરસ્ટ્રીપ) છે. આ એક્સપ્રેસવેને મોટા આર્થિક કોરિડોર તરીકે જોવામાં આવી રહ્યો છે, જેના માર્ગમાં આવતા 12 જિલ્લાઓમાં લગભગ 2,635 હેક્ટર જમીન પર મેન્યુફેક્ચરિંગ અને લોજિસ્ટિક્સ કોરિડોર વિકસાવવામાં આવશે.

આ એક્સપ્રેસવે લોજિસ્ટિક્સ ખર્ચ ઘટાડશે અને સપ્લાય ચેઈનને વધુ સારી બનાવશે. ખેડૂતોને શહેરી અને નિકાસ બજારો સુધી સીધી પહોંચ મળશે, જેથી તેઓને પાકના વધુ સારા ભાવ મળશે અને ગ્રામીણ આવકમાં વધારો થશે.

ગંગા એક્સપ્રેસવે રાજ્યના એક્સપ્રેસવે નેટવર્કની કરોડરજ્જુ સમાન કાર્ય કરશે. તેની સાથે આગ્રા-લખનઉ એક્સપ્રેસવે, જેવર લિંક એક્સપ્રેસવે અને મેરઠથી હરિદ્વાર સુધીના વિસ્તરણ જેવા અનેક લિંક કોરિડોરનું આયોજન પણ કરવામાં આવ્યું છે.