બજેટ સત્ર પહેલાં પીએમ મોદીએ કર્યું સંબોધન, 'ત્રીજા કાર્યકાળમાં વિકસિત ભારતના સંકલ્પને પૂર્ણ કરીશું'

બજેટ સત્ર પહેલાં પીએમ મોદીએકહ્યું હતું કે, આ મારા ત્રીજા કાર્યકાળનું પ્રથમ પૂર્ણ બજેટ છે. આ બજેટ સત્ર નવો આત્મવિશ્વાસ પેદા કરશે અને નવી ઉર્જા આપશે. આજે બજેટ સત્રની શરૂઆતમાં હું સમૃદ્ધિની દેવી લક્ષ્મીજીને નમન કરું છું. સદીઓથી આપણે આવા પ્રસંગોએ દેવી લક્ષ્મીને યાદ કરતા આવ્યા છીએ. માતા લક્ષ્મી આપણને સફળતા અને બુદ્ધિ આપે છે. હું મહાલક્ષ્મીને પ્રાર્થના કરું છું કે દેશના દરેક ગરીબ અને મધ્યમ વર્ગને દેવી લક્ષ્મીની વિશેષ કૃપા પ્રાપ્ત થાય.

પ્રધાનમંત્રીએ કહ્યું, મારા ત્રીજા કાર્યકાળનું આ પ્રથમ પૂર્ણ બજેટ છે. હું વિશ્વાસ સાથે કહી શકું છું કે આ બજેટ સત્ર અને 2047માં આઝાદીના 100 વર્ષ પૂર્ણ થાય ત્યાં સુધીમાં વિકસિત ભારત માટે દેશે જે સંકલ્પ લીધો છે, તેનાથી તેમાં નવો આત્મવિશ્વાસ પેદા થશે અને નવી ઉર્જા મળશે. 140 કરોડ લોકો તેમના સંકલ્પ સાથે આ વિઝનને સાકાર કરશે. અમારા ત્રીજા કાર્યકાળમાં અમે દેશના સર્વાંગી વિકાસના સંકલ્પ સાથે મિશન મોડમાં આગળ વધી રહ્યા છીએ.

પ્રધાનમંત્રીએ કહ્યું, નવીનતા, સમાવેશ અને રોકાણ એ સતત અમારી આર્થિક પ્રવૃત્તિ રોડમેપનો પાયાનો રહ્યો છે. આ સત્રમાં, હંમેશાની જેમ ગૃહમાં ઘણા ઐતિહાસિક બિલો પર ચર્ચા કરવામાં આવશે અને વ્યાપક વિચાર-મંથન સાથે એવા કાયદા બનશે જે રાષ્ટ્રની શક્તિમાં વધારો કરશે. આ સત્રમાં ઘણા મહત્વના નિર્ણયો લેવામાં આવશે, ખાસ કરીને મહિલા શક્તિના ગૌરવને પુનઃસ્થાપિત કરવા સમાન અધિકારો અપાશે.

પ્રધાનમંત્રીએ કહ્યું, આ બજેટ સત્રમાં તમામ સાંસદો વિકસિત ભારતને મજબૂત કરવામાં યોગદાન આપશે. ખાસ કરીને યુવા સાંસદો માટે આ એક સુવર્ણ તક છે. કારણ કે તેઓ ગૃહમાં જેટલી વધુ જાગૃતિ અને ભાગીદારી વધારશે તેટલાં વિકસિત ભારતના ફળ તેમની આંખો સમક્ષ દેખાશે. તેથી યુવા સાંસદો માટે આ અમૂલ્ય તક છે. મને આશા છે કે આ બજેટ સત્રમાં અમે દેશની આશાઓ અને આકાંક્ષાઓ પર ખરા ઉતરીશું.