બિહારમાં નવી સરકાર રચવાની પ્રક્રિયા શરૂ

બિહારમાં નવી સરકાર રચવાની પ્રક્રિયા શરૂ: મુખ્ય ચૂંટણી અધિકારીએ રાજ્યપાલને યાદી સોંપી

બિહાર વિધાનસભાની ચૂંટણીનું પરિણામ જાહેર થયા બાદ હવે રાજ્યમાં નવી સરકારની રચના માટેની પ્રક્રિયા સત્તાવાર રીતે શરૂ થઈ ગઈ છે.

ચૂંટાયેલા ધારાસભ્યોની યાદી સુપરત

બિહારના મુખ્ય ચૂંટણી અધિકારી વિનોદ સિંહ ગુંજિયાલે પટનાના રાજભવન ખાતે રાજ્યપાલ આરિફ મોહમ્મદ ખાનને 243 નવા ચૂંટાયેલા ધારાસભ્યોની સત્તાવાર યાદી સુપરત કરી છે. આ યાદીમાં NDAના 202, મહાગઠબંધનના 34 અને AIMIM, ભારતીય સમાવેશી પાર્ટી અને બહુજન સમાજ પાર્ટીના વિજેતા ઉમેદવારોના નામનો સમાવેશ થાય છે.

આચારસંહિતા હટાવાઈ

આ દરમિયાન, ચૂંટણી પંચે બિહારમાં વિધાનસભા ચૂંટણી અને અન્ય 6 રાજ્યો તથા એક કેન્દ્રશાસિત પ્રદેશમાં યોજાયેલી પેટાચૂંટણીઓ બાદ આદર્શ આચારસંહિતા તાત્કાલિક અસરથી હટાવી દીધી છે.

નીતિશ કુમાર આજે રાજીનામું આપશે

બિહારમાં નવી સરકારની રચનાની તૈયારીઓ વચ્ચે, વર્તમાન મુખ્યમંત્રી નીતિશ કુમારની કેબિનેટની આજે અંતિમ બેઠક પટનામાં યોજાશે. નીતિશ કુમારની અધ્યક્ષતામાં યોજાનારી આ બેઠકમાં મંત્રી મંડળને ભંગ કરવાની ભલામણ કરાય તેવી સંભાવના છે. કેબિનેટની બેઠક બાદ, મુખ્યમંત્રી નીતિશ કુમાર આજે જ પોતાનું રાજીનામું રાજ્યપાલને સુપરત કરશે. આ રાજીનામા બાદ નવી સરકારની રચનાની પ્રક્રિયા વધુ ઝડપી બનશે.