ભારત-નેપાળ સરહદ પર હાઇ એલર્ટ, હિંસક વિરોધ પ્રદર્શનો બાદ સુરક્ષા વધારી

નેપાળમાં છેલ્લા બે દિવસથી ચાલી રહેલા હિંસક વિરોધ પ્રદર્શનોને કારણે કેન્દ્રીય એજન્સીઓએ ભારત-નેપાળ સરહદ પર સુરક્ષા ચેતવણી જારી કરી છે. ચેતવણી આપવામાં આવી છે કે, અસામાજિકતત્ત્વો અશાંતિનો લાભા લઈને પડોશીઓ ભારતીય રાજ્યોમાં હિંસા ભડકાવી શકે છે.

ગુપ્તચર સૂત્રોએ ચેતવણી આપી છે કે, અસામાજિક તત્વો નેપાળમાં અશાંત વાતાવરણનો લાભ લઈને સરહદી ભારતીય રાજ્યોમાં હિંસા ભડકાવવા અને જાહેર સંપત્તિને નુકસાન પહોંચાડવાનો પ્રયાસ કરી શકે છે. 

અધિકારીઓના જણાવ્યા અનુસાર, આ ગુપ્ત માહિતી પછી ભારત-નેપાળ સરહદ પર તૈનાત સુરક્ષા દળો, જેમાં ઉત્તરાખંડ પોલીસ, ઉત્તર પ્રદેશ પોલીસ, બિહાર પોલીસ અને સશસ્ત્ર સીમા દળ (એસએસબી)નો સમાવેશ થાય છે, ને એલર્ટ કરવામાં આવ્યા છે. ઉત્તરાખંડ, ઉત્તર પ્રદેશ, પશ્ચિમ બંગાળ અને બિહારમાં 1,751 કિલોમીટર લાંબી ખુલ્લી સરહદ પર કાયદો અને વ્યવસ્થાના કોઈપણ સંભવિત ઉલ્લંઘનને રોકવા માટે સુરક્ષા પગલાં વધુ કડક કરવામાં આવ્યા છે.

સુરક્ષા દળોને મહત્તમ સતર્કતા રાખવા અને દેખરેખ વધારવા સૂચના આપવામાં આવી છે. નેપાળ સેના દ્વારા કર્ફ્યુ લાદવામાં આવ્યા બાદ ઉત્તરાખંડના ચંપાવતમાં સુરક્ષા કડક કરવામાં આવી છે. પિથોરાગઢના ધારચુલામાં, સ્થાનિક લોકો તેમના સંબંધીઓ માટે ચિંતિત છે. સુરક્ષા અધિકારીઓએ સરહદ પર પણ દેખરેખ વધારી દીધી છે.

બિહારના મધુબનીમાં સરહદી ચોકીઓ પર SSBને પણ તૈનાત કરવામાં આવ્યા છે. પોલીસ અધિક્ષક યોગેન્દ્ર કુમારે જણાવ્યું હતું કે, "નેપાળમાં વર્તમાન પરિસ્થિતિને ધ્યાનમાં રાખીને મધુબની પોલીસ સંપૂર્ણપણે સતર્ક છે. તમામ સરહદી પોલીસ સ્ટેશનો હાઇ એલર્ટ પર છે. બધા સર્કલ ઇન્સ્પેક્ટર અને સ્ટેશન સ્ટાફ ક્ષેત્રમાં છે, ખાસ કરીને સરહદી ચોકીઓ પર, જ્યાં 24 કલાક દેખરેખ રાખવામાં આવી રહી છે."

તેમણે કહ્યું, "સરહદ પાર કરતા લોકોની સંપૂર્ણ તપાસ કર્યા પછી જ પ્રવેશની મંજૂરી આપવામાં આવી રહી છે. અમે ખાતરી કરી રહ્યા છીએ કે કોઈ પણ અસામાજિક તત્વો સરહદ પાર કરી શકે નહીં." ઉત્તર પ્રદેશના સાત સરહદી જિલ્લાઓ (પીલીભીત, લખીમપુર ખીરી, બહરાઇચ, શ્રાવસ્તી, બલરામપુર, સિદ્ધાર્થનગર અને મહારાજગંજ) માં સુરક્ષા વધારી દેવામાં આવી છે.

પોલીસ મહાનિર્દેશક રાજીવ કૃષ્ણાએ જણાવ્યું હતું કે સુરક્ષા વ્યૂહરચનામાં 24 કલાક પેટ્રોલિંગ અને પ્રવેશ સ્થળો પર કડક ચેકિંગનો સમાવેશ થાય છે, જેમાં 73 ચેકપોઇન્ટને હાઇ એલર્ટ પર રાખવામાં આવ્યા છે.

લખીમપુર ખેરી જિલ્લાના વરિષ્ઠ પોલીસ અધિક્ષક સંકલ્પ શર્માએ જણાવ્યું હતું કે, "અમે નેપાળમાં કાયદો અને વ્યવસ્થાની સ્થિતિ પર નજર રાખી રહ્યા છીએ. અમે BSF અને અન્ય સુરક્ષા અધિકારીઓ સાથે સતત સંકલનમાં છીએ."

તેમણે કહ્યું કે સંયુક્ત પેટ્રોલિંગ હાથ ધરવામાં આવી રહ્યું છે અને પૂરતા પ્રમાણમાં પોલીસ દળ તૈનાત કરવામાં આવ્યું છે. અધિકારીઓએ જણાવ્યું હતું કે ગૌરીફંતા સરહદ (જે પાલિયા તહસીલને નેપાળમાં ધનગઢી સાથે જોડે છે) પર પરિસ્થિતિ તણાવપૂર્ણ છે પરંતુ કડક દેખરેખ હેઠળ શાંત રહે છે. દરમિયાન, પશ્ચિમ બંગાળના દાર્જિલિંગ જિલ્લામાં પાણીટાંકી ખાતે ભારત-નેપાળ સરહદ પર પણ હાઇ એલર્ટ પર રાખવામાં આવ્યું છે, સુરક્ષા દળો 24 કલાક નજર રાખી રહ્યા છે.