મોદી કેબિનેટમાં પહેલીવાર શિવરાજ સિંહ ચૌહાણ બન્યા મંત્રી, લીધા પદ અને ગોપનીયતાના શપથ

NDA સંસદીય દળના નેતા નરેન્દ્ર મોદીએ રવિવારે મોડી સાંજે રાષ્ટ્રપતિ ભવનમાં આયોજિત સમારોહમાં ત્રીજી વખત દેશના પ્રધાનમંત્રી  તરીકે શપથ લીધા. તેમની સાથે કેન્દ્રીય કેબિનેટના સભ્યોએ પણ શપથ લીધા છે. જેમાં મધ્યપ્રદેશના પૂર્વ મુખ્યમંત્રી અને વિદિશાથી નવા ચૂંટાયેલા સાંસદ શિવરાજ સિંહ ચૌહાણનો સમાવેશ થાય છે. તેમણે કેન્દ્રમાં કેબિનેટ મંત્રી તરીકે પદ અને ગુપ્તતાના શપથ લીધા.

વિદિશા સીટથી સાંસદ તરીકે ચૂંટાયેલા શિવરાજ સિંહ ચૌહાણ પ્રથમ વખત કેન્દ્રીય મંત્રી બન્યા છે. તાજેતરમાં પૂર્ણ થયેલી લોકસભા ચૂંટણીમાં તેઓ છઠ્ઠી વખત વિદિશાથી સાંસદ તરીકે ચૂંટાયા છે. શિવરાજ સિંહ ચૌહાણ રાજ્યમાં ભાજપના સૌથી શક્તિશાળી નેતા છે. તેઓ મધ્યપ્રદેશના પહેલા મુખ્યમંત્રી છે, જેમણે સૌથી વધુ સમય સુધી મુખ્યમંત્રી પદ સંભાળ્યું છે. તેઓ ચાર વખત મધ્યપ્રદેશના મુખ્યમંત્રી રહી ચૂક્યા છે. તેમનો કાર્યકાળ લગભગ 16.5 વર્ષ સુધી ચાલ્યો.

ગયા વર્ષે નવેમ્બરમાં યોજાયેલી વિધાનસભાની ચૂંટણીમાં ભાજપે શાનદાર પ્રદર્શન કર્યું હતું અને 163 બેઠકો જીતી હતી ત્યારે એવી અટકળો હતી કે તેઓ પાંચમી વખત મુખ્યમંત્રી તરીકે શપથ લેશે, પરંતુ જ્યારે પાર્ટી નેતૃત્વએ ડૉ. મોહન યાદવના નામને મંજૂરી આપી, તો શિવરાજે આ નિર્ણયનો સહર્ષ સ્વીકાર કર્યો.

શિવરાજ સિંહ ચૌહાણે રાજકારણમાં પ્રવેશતા પહેલા રાષ્ટ્રીય સ્વયંસેવક સંઘમાં કાર્યકર તરીકે કામ કર્યું હતું. રાજ્યના મુખ્યમંત્રીની જવાબદારી સંભાળતા પહેલા શિવરાજ પાર્ટીના પ્રદેશ અધ્યક્ષ અને BJYMના રાષ્ટ્રીય અધ્યક્ષ પણ રહી ચૂક્યા છે. મધ્યપ્રદેશમાં તેમને 'મામા' પણ કહેવામાં આવે છે.