સંરક્ષણ ક્ષેત્રે ભારતની આગેકૂચ: ૬૦ કિમી સુધી સચોટ નિશાન સાધવામાં પિનાકા રોકેટ સફળ

સ્વદેશી ટેકનોલોજીનો દમ: DRDO એ પિનાકા લોન્ગ રેન્જ ગાઇડેડ રોકેટનું સફળ ફ્લાઇટ-ટેસ્ટ કર્યું

ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) દ્વારા આજે 8 જુલાઈ 2026ના રોજ ચાંદીપુર ખાતે આવેલા ઈન્ટિગ્રેટેડ ટેસ્ટ રેન્જ (ITR) પર 'પિનાકા લોન્ગ રેન્જ ગાઇડેડ રોકેટ' (LRGR) નું સફળ ફ્લાઇટ-ટેસ્ટ કરવામાં આવ્યું હતું.

આ પરીક્ષણ દરમિયાન રોકેટને ૬૦ કિમીના નિર્ધારિત લઘુત્તમ અંતર માટે ટેસ્ટ કરવામાં આવ્યું હતું. રોકેટે પોતાની નિર્ધારિત ઉડાન દરમિયાન તમામ ગતિવિધિઓ અને દાવપેચ (manoeuvres) ખૂબ જ ચોકસાઈ સાથે પૂર્ણ કર્યા હતા અને અંતે લક્ષ્ય પર સચોટ નિશાન સાધ્યું હતું. પરીક્ષણ દરમિયાન તમામ રેન્જ ઈન્સ્ટ્રુમેન્ટ્સ દ્વારા રોકેટના સમગ્ર માર્ગ (trajectory) પર નજર રાખવામાં આવી હતી.

પિનાકા LRGR ની ડિઝાઇન આર્મેન્ટ રિસર્ચ એન્ડ ડેવલપમેન્ટ એસ્ટાબ્લિશમેન્ટ (ARDE) દ્વારા હાઈ એનર્જી મટિરિયલ્સ રિસર્ચ લેબોરેટરી (HEMRL) સાથે મળીને તૈયાર કરવામાં આવી છે. આમાં ડિફેન્સ રિસર્ચ એન્ડ ડેવલપમેન્ટ લેબોરેટરી (DRDL) અને રિસર્ચ સેન્ટર ઈમારત (RCI) એ ટેકનિકલ સહયોગ આપ્યો છે. ખાસ વાત એ છે કે, આ રોકેટને અગાઉથી કાર્યરત પિનાકા લોન્ચરથી જ લોન્ચ કરવામાં આવ્યું હતું, જે તેની બહુમુખી ક્ષમતા અને વિવિધ રેન્જના રોકેટને એક જ લોન્ચરથી છોડવાની ભારતીય સંરક્ષણ દળોની તૈયારી દર્શાવે છે.

આ મહત્વપૂર્ણ સફળતા બદલ સંરક્ષણ મંત્રી રાજનાથ સિંહે DRDO, ભારતીય સેના અને ઉદ્યોગ જગતના તમામ સહયોગીઓને અભિનંદન પાઠવ્યા છે. તેમણે આ સિદ્ધિને ભારતના સ્વદેશી ડિઝાઇન અને વિકાસ ક્ષેત્રે એક મોટો સીમાચિહ્નરૂપ ગણાવ્યો છે. DRDO ના ચેરમેન રાજેશ કુમાર સિંહે પણ પરીક્ષણ પર નજીકથી નજર રાખી હતી અને સમગ્ર ટીમના પ્રયાસોની સરાહના કરી હતી.