સિદ્ધારમૈયાને કર્ણાટકની કમાન અને ડી કે શિવકુમારને તેમના ડેપ્યુટી બનાવવામાં આવ્યા

20 મેના રોજ શપથ ગ્રહણ સમારોહ યોજાશે, જેમાં મુખ્યમંત્રી અને નાયબ મુખ્યમંત્રીની સાથે મંત્રીઓનું જૂથ પણ શપથ લેશે

કોંગ્રેસના વરિષ્ઠ નેતા સિદ્ધારમૈયા કર્ણાટકના આગામી મુખ્યમંત્રી હશે અને ડી કે શિવકુમાર તેમના નાયબ હશે તેવું કોંગ્રેસ પાર્ટી નિર્ણય પર પહોંચી છે. તેમનો શપથ ગ્રહણ સમારોહ શનિવાર, 20 મે, 2023ના રોજ યોજાશે.

કોંગ્રેસ પાર્ટીએ કર્ણાટકની કમાન સિદ્ધારમૈયાને સોંપી દીધી છે, જ્યારે ડીકે શિવકુમારને નાયબ મુખ્યમંત્રી બનાવવામાં આવ્યા છે, ગુરુવારે કોંગ્રેસ મુખ્યાલયમાં પાર્ટીના મહાસચિવ કેસી વેણુગોપાલે જણાવ્યું હતું.

વેણુગોપાલે કહ્યું કે, અમારા બંને નેતાઓ સિદ્ધારમૈયા અને શિવકુમાર રાજ્ય ચલાવવાની ક્ષમતા ધરાવે છે. બંનેએ કર્ણાટક ચૂંટણીમાં ખૂબ જ મહેનત કરી છે. આવી સ્થિતિમાં પાર્ટીએ સિદ્ધારમૈયાને મુખ્યમંત્રી અને ડીકે શિવકુમારને કર્ણાટકના નાયબ મુખ્યમંત્રી બનાવ્યા છે.

વેણુગોપાલે વધુમાં કહ્યું કે શિવકુમાર સંસદીય ચૂંટણીના અંત સુધી કર્ણાટક પ્રદેશ કોંગ્રેસ સમિતિ (પીસીસી)ના પ્રમુખ તરીકે ચાલુ રહેશે. તેમણે કહ્યું કે 20 મેના રોજ શપથ ગ્રહણ સમારોહ યોજાશે, જેમાં મુખ્યમંત્રી અને નાયબ મુખ્યમંત્રીની સાથે મંત્રીઓનું જૂથ પણ શપથ લેશે.