સુદર્શન પટનાયકે રેતીથી બનાવી પ્રધાનમંત્રી મોદીની આકૃતિ, 11 વર્ષની યોજનાઓને કલાત્મક ઓળખ આપી

પ્રધાનમંત્રી પદ પર નરેન્દ્ર મોદીના 11 વર્ષ થઈ ચૂક્યા છે. તેમના ત્રીજા કાર્યકાળને સોમવારે એક વર્ષ પૂર્ણ થયું છે. આ પ્રસંગે સેન્ડ આર્ટિસ્ટ સુદર્શન પટનાયકે રેતી પર તેમની આકૃતિ બનાવીને તેમને શુભેચ્છા પાઠવી છે. વાતચીત દરમિયાન સુદર્શન પટનાયકે કહ્યું, પ્રધાનમંત્રી નરેન્દ્ર મોદીએ 11 વર્ષમાં દેશ માટે જે કર્યું, તેને અલગ-અલગ ક્ષેત્રના લોકો પોત-પોતાની રીતે સેલિબ્રેટ કરી રહ્યા છે. મેં કલાના માધ્યમથી તેમની આકૃતિ બનાવીને તેમનો આભાર માન્યો.

પટનાયકે પ્રધાનમંત્રીના રૂપમાં 11 વર્ષની સમર્પિત સેવા પૂરી કરવા બદલ તેમની છ ફૂટ ઊંચી રેતીની મૂર્તિ બનાવી છે. તેમણે તેના માટે લગભગ 5 ટન રેતીનો ઉપયોગ કર્યો છે. આ મૂર્તિને બનાવવા માટે રેતી કલા સંસ્થાના વિદ્યાર્થીઓએ તેમનો સાથ આપ્યો.

આકૃતિમાં તમામ યોજનાઓને સ્થાન આપવામાં આવ્યું
પટનાયકે કહ્યું કે આકૃતિમાં એ તમામ યોજનાઓને પણ સ્થાન આપવામાં આવ્યું છે, જેના કારણે દેશે છેલ્લા 11 વર્ષમાં વિકાસની રફ્તાર પકડી છે. મેં રેતીના માધ્યમથી ઓપરેશન સિંદૂર પણ બતાવ્યું છે, જેના દમ પર ભારતે ન માત્ર પાકિસ્તાનને પરંતુ આખી દુનિયાને બતાવ્યું કે આતંકવાદ વિરુદ્ધ ભારત શું કરી શકે છે.

'જર્ની ટુ વિકસિત ભારત' શીર્ષક આપ્યું
સુદર્શન પટનાયકે રેતી પર પ્રધાનમંત્રીની આકૃતિ બનાવી છે. તિરંગા રંગમાં 11 વર્ષને પ્રદર્શિત કર્યા છે.  આના પર બ્લૂ અને ગોલ્ડન કલરમાં 'મોદી યુગના 11 વર્ષ'  લખ્યું છે. આકૃતિને 'જર્ની ટુ વિકસિત ભારત' ટાઇટલ આપ્યું છે. આ સિવાય રેતી પર પ્રધાનમંત્રી જન ધન યોજના, ડિજિટલ ઈન્ડિયા, પીએમ કિસાન સન્માન નિધિ યોજના, પીએમ વિશ્વકર્મા કૌશલ સન્માન, મેક ઈન ઈન્ડિયા, મુદ્રા યોજના, ઓપરેશન સિંદૂર અને યુપીઆઈની આકૃતિ બનાવી છે.

છેલ્લા દાયકામાં મોદીજીના માર્ગદર્શન હેઠળ, ભારતે વિકાસ અને નવીકરણનો ઐતિહાસિક યુગ જોયો
પટનાયકે કહ્યું, આ સંદેશ ફક્ત રેતી પર બનાવેલા શિલ્પ જેવો નથી, પરંતુ પ્રગતિ અને વિકસિત ભારતના સહિયારા સ્વપ્નનું પ્રતીક છે. છેલ્લા દાયકામાં, તેમના ગતિશીલ માર્ગદર્શન હેઠળ, ભારતે વિકાસ અને નવીકરણનો ઐતિહાસિક યુગ જોયો છે. વિશ્વ-સ્તરીય માળખાગત સુવિધાઓ અને ક્રાંતિકારી ડિજિટલ પરિવર્તનથી લઈને બોલ્ડ આર્થિક સુધારાઓ, પાયાના સ્તરે સશક્તિકરણ અને વૈશ્વિક રાજદ્વારી સુધી, દેશની પ્રતિષ્ઠા વિશ્વમાં વધી છે.