હરિયાણાના વિવિધ જિલ્લાઓમાં આજે મતગણતરી, ગોઠવાયો લોખંડી બદોબસ્ત

હરિયાણાના વિવિધ જિલ્લાઓમાં આજે મ્યુનિસિપલ કોર્પોરેશનની ચૂંટણીઓની મતગણતરી ચાલી રહી છે. કરનાલ, સોનીપત, નૂહ, સિરસા અને ગુરુગ્રામ સહિત ઘણા શહેરોમાં મત ગણતરી માટે કડક સુરક્ષા વ્યવસ્થા ગોઠવવામાં આવી છે.

કરનાલમાં યોજાયેલી મ્યુનિસિપલ કોર્પોરેશનની ચૂંટણી માટે મતગણતરી  સેક્ટર 14 સ્થિત પંડિત ચિરંજીલાલ સરકારી કોલેજમાંથઈ રહી છે. સવારે 8 વાગ્યે મતગણતરી શરૂ થઈ ગઈ છે જેમાં 20 વોર્ડ અને મેયર પદ માટે મતગણતરી થઈ રહી છે. ભાજપના ઉમેદવારો પહેલાથી જ બે વોર્ડમાં બિનહરીફ ચૂંટાઈ આવ્યા છે. મેયર પદ માટે ભાજપ તરફથી રેણુ બાલા ગુપ્તા અને કોંગ્રેસ તરફથી મનોજ વાધવા મેદાનમાં છે.

સોનીપતના મેયર પેટાચૂંટણી માટે મતગણતરી મોહના સ્થિત BITS કોલેજ ખાતે યોજાઈ રહી છે. મત ગણતરી માટે અહીં 20 ટેબલ ગોઠવવામાં આવ્યા છે અને કડક સુરક્ષા વ્યવસ્થા ગોઠવવામાં આવી છે. સોનીપતમાં સૌથી ઓછું મતદાન નોંધાયું હતું, જેના કારણે સ્પર્ધા વધુ રસપ્રદ બની છે.

બાયપાસ પર સ્થિત મોડેલ સંસ્કૃતિ વિદ્યાલય કેમ્પસમાં તાવડુ નગરપાલિકાની મત ગણતરી ચાલી રહી છે. અહીં 15 વોર્ડ કાઉન્સિલરો અને એક અધ્યક્ષની ચૂંટણી થઈ હતી. 

સિરસા નગર પરિષદની ચૂંટણી માટે મતગણતરી ચૌધરી દેવીલાલ યુનિવર્સિટીના મલ્ટીપર્પઝ હોલમાં થઈ રહી છે. સવારે 8 વાગ્યે મતગણતરી શરૂ થઈ ગઈ છે. અહીં 32 વોર્ડ કાઉન્સિલરો અને ચેરમેન પદ માટે મત ગણતરી ચાલી રહી છે. સિરસામાં પહેલીવાર જનતાએ ચેરમેન પદ માટે સીધો મતદાન કર્યું છે. મુખ્ય સ્પર્ધા કોંગ્રેસ અને એનડીએ ગઠબંધન વચ્ચે છે.

ગુરુગ્રામમાં મ્યુનિસિપલ કોર્પોરેશનની ચૂંટણી માટે ચુસ્ત સુરક્ષા વ્યવસ્થા વચ્ચે મતગણતરી ચાલી રહી છે. અહીં 550થી વધુ પોલીસકર્મીઓ તૈનાત છે, જ્યારે 100થી વધુ પોલીસકર્મીઓને રિઝર્વમાં રાખવામાં આવ્યા છે. દરેક જિલ્લામાં મત ગણતરી માટે વહીવટીતંત્રે કડક સુરક્ષા વ્યવસ્થા કરી છે. ગુરુગ્રામમાં, ગણતરી સ્થળે 10 ACP હાજર છે, જ્યારે કરનાલ, સિરસા અને સોનીપતમાં પણ પોલીસ દળ તહેનાત કરવામાં આવ્યું છે.

ગુરુગ્રામના એડીસી હિતેશ મીણા અને ડીસીપી કરણ ગોયલે જણાવ્યું હતું કે ચૂંટણી પ્રક્રિયા નિષ્પક્ષ અને શાંતિપૂર્ણ રીતે પૂર્ણ થશે. જિલ્લા ચૂંટણી અધિકારી અને ડીસી અજય કુમાર મતગણતરી કેન્દ્રો પર સતત નજર રાખી રહ્યા છે.