હિમંતા સરમા સતત બીજી વખત આસામના મુખ્યમંત્રી બન્યા

આસામની રાજનીતિમાં મંગળવારનો દિવસ ઐતિહાસિક બની ગયો, જ્યારે હિમંતા બિસ્વા સરમાએ સતત બીજી વખત મુખ્યમંત્રી પદના શપથ લીધા. આ સાથે જ તેઓ આસામમાં સતત બે કાર્યકાળ સુધી મુખ્યમંત્રી બનનારા પ્રથમ બિન-કોંગ્રેસી નેતા બન્યા. ગુવાહાટીમાં આયોજિત ભવ્ય શપથ ગ્રહણ સમારોહમાં રાજ્યપાલ લક્ષ્મણ પ્રસાદ આચાર્યએ તેમને પદ અને ગુપ્તતાના શપથ લેવડાવ્યા હતા.

રવિવારે એનડીએ ધારાસભ્ય દળના નેતા તરીકે ચૂંટાયા બાદ રાજ્યપાલે તેમને મુખ્યમંત્રી તરીકે નિયુક્ત કર્યા હતા. આસામમાં એનડીએ સરકારનો આ સતત ત્રીજો કાર્યકાળ પણ છે. અગાઉ 2016માં ભાજપના નેતૃત્વમાં પહેલીવાર સર્વાનંદ સોનોવાલ મુખ્યમંત્રી બન્યા હતા, જ્યારે 2021માં હિમંતા બિસ્વા સરમાએ રાજ્યની કમાન સંભાળી હતી.

શપથ ગ્રહણ સમારોહ ખૂબ જ ખાસ ગણવામાં આવ્યો હતો. જેમાં પ્રધાનમંત્રી નરેન્દ્ર મોદી, કેન્દ્રીય ગૃહમંત્રી અમિત શાહ, રક્ષામંત્રી રાજનાથ સિંહ, નાણામંત્રી નિર્મલા સીતારમણ અને ભાજપના રાષ્ટ્રીય અધ્યક્ષ નીતિન નવીન ઉપરાંત એનડીએ શાસિત રાજ્યોના મુખ્યમંત્રીઓ અને નાયબ મુખ્યમંત્રીઓ હાજર રહ્યા હતા.

હિમંતા બિસ્વા સરમાની રાજકીય સફર પણ ઘણી રસપ્રદ રહી છે. 2015માં, તેમણે કોંગ્રેસ છોડી દીધી અને અમિત શાહની પહેલ પર ભાજપમાં જોડાયા. તે સમયે આસામમાં કોંગ્રેસનું વર્ચસ્વ હતું અને ભાજપ પાસે માત્ર પાંચ ધારાસભ્યો હતા, પરંતુ હિમંતા સરમાએ પૂર્વોત્તરમાં ભાજપને મજબૂત કરવા વ્યૂહાત્મક રીતે કામ કર્યું હતું.