હોર્મુઝને લઈને બ્રિટને બોલાવી 35 દેશોની બેઠક, ભારત પણ સામેલ: વિદેશ મંત્રાલય

બ્રિટનની અધ્યક્ષતામાં હોર્મુઝ સ્ટ્રેટને ફરી સુરક્ષિત રીતે ખોલવા માટે ભારત સહિત 35 દેશોની મહત્વની બેઠક યોજાઈ હતી. આ બેઠકમાં ઈરાનના હુમલાઓને વૈશ્વિક આર્થિક સુરક્ષા માટે જોખમી ગણાવી દરિયાઈ માર્ગોને પુનઃસ્થાપિત કરવા પર ભાર મૂકવામાં આવ્યો હતો.

હોર્મુઝ સ્ટ્રેટને ફરીથી ખોલવાનો માર્ગ શોધવા અને તેને વિશ્વ માટે સુરક્ષિત બનાવવાની ઝુંબેશ હેઠળ બ્રિટિશ વિદેશ મંત્રી યવેટ કૂપરની અધ્યક્ષતામાં બેઠક યોજાઈ હતી. જેમાં ભારત પણ સામેલ થયું છે. વિદેશ મંત્રાલયના પ્રવક્તા રણધીર જયસ્વાલે સાપ્તાહિક પ્રેસ બ્રીફિંગમાં આ અંગેની માહિતી આપી હતી. એક પ્રશ્નના જવાબમાં તેમણે જણાવ્યું કે યુકે તરફથી ભારતને પણ એક પત્ર મળ્યો છે અને તેમાં આપણું પ્રતિનિધિત્વ ભારતના વિદેશ સચિવ વિક્રમ મિસ્રી કરી રહ્યા છે.

બુધવારે હોર્મુઝ પર મહત્વની બેઠકની જાહેરાત બ્રિટિશ પીએમ કીર સ્ટાર્મરે કરી હતી. તેમણે કહ્યું હતું કે ટૂંક સમયમાં જ આ બેઠક યોજાશે. ગુરુવારે ઓનલાઇન મોડમાં તેનું આયોજન કરવામાં આવ્યું હતું. આ બેઠકનો હેતુ હોર્મુઝ સ્ટ્રેટને ફરીથી ખોલવાના રસ્તાઓ શોધવાનો છે. બેઠક દરમિયાન કૂપરે હોર્મુઝ જલડમરુમધ્યમાં વધતા તણાવ વચ્ચે ઈરાનની આકરી ટીકા કરતા તેને "વૈશ્વિક આર્થિક સુરક્ષા પર સીધો હુમલો" ગણાવ્યો હતો.

મહત્વની બેઠકની અધ્યક્ષતા કરતા તેમણે કહ્યું કે ઈરાનની "બેદરકારી" એ આંતરરાષ્ટ્રીય વ્યાપાર અને ઉર્જા પુરવઠાને ગંભીર જોખમમાં મૂકી દીધો છે. તેમણે દાવો કર્યો હતો કે બ્રિટન આ સંકટને રાજદ્વારી રીતે ઉકેલવાના પ્રયાસમાં આગળ વધી રહ્યું છે. યુકેનું લક્ષ્ય હોર્મુઝ જલડમરુમધ્યમાં દરિયાઈ માર્ગોને ફરીથી સુરક્ષિત અને કાર્યરત કરવાનું છે, જેને ઈરાને અમેરિકા-ઈઝરાયેલ અભિયાનના જવાબમાં નિશાન બનાવ્યું છે.

કૂપરના જણાવ્યા અનુસાર, આ વ્યૂહાત્મક દરિયાઈ માર્ગમાં અત્યાર સુધીમાં 25 થી વધુ જહાજો પર હુમલા થઈ ચૂક્યા છે. જેના કારણે અંદાજે 2,000 જહાજો પર સવાર લગભગ 20,000 નાવિકો ફસાયેલા છે, જેનાથી વૈશ્વિક સપ્લાય ચેઈન અને ઉર્જા બજાર પર દબાણ સતત વધી રહ્યું છે. કુવૈત, બહેરીન, કતાર, યુએઈ, સાઉદી, ઓમાન અને ઈરાકના વ્યાપાર માર્ગો પર જ નહીં પરંતુ એશિયા માટે લિક્વિડ નેચરલ ગેસ, આફ્રિકા માટે ખાતર અને સમગ્ર વિશ્વ માટે જેટ ફ્યુઅલના પુરવઠા પર અસર પડી છે.

ઈરાનનું આ વલણ એવા દેશો પ્રત્યે છે જેઓ આ સંઘર્ષમાં ક્યારેય સામેલ નહોતા—જેની અમે અને વિશ્વભરના અન્ય 130 દેશોએ સંયુક્ત રાષ્ટ્રમાં કડક નિંદા કરી છે. આ સ્થિતિ માત્ર પ્રાદેશિક તણાવમાં જ વધારો નથી કરી રહી, પરંતુ વિશ્વભરની અર્થવ્યવસ્થાઓ માટે પણ મોટું જોખમ બની રહી છે, ખાસ કરીને એવા સમયે જ્યારે ઉર્જા સંકટ પહેલાથી જ ઘેરાતું જઈ રહ્યું છે.