GSTના આગામી તબક્કાના સુધારાથી વેપાર કરવો વધુ સરળ બનશે: PM મોદી

PM મોદીએ કહ્યું કે, GST સુધારાના આગામી તબક્કાથી રોકાણને પ્રોત્સાહન મળશે અને ‘વિકસિત ભારત’ના લક્ષ્યને વધુ મજબૂત આધાર મળશે

PM મોદીએ મહત્ત્વપૂર્ણ નિવેદન આપ્યું... તેમણે કહ્યું કે, GST સુધારાના આગામી તબક્કાથી વેપારીઓ માટે અનુપાલન પ્રક્રિયા વધુ સરળ બનશે અને રિફંડની પ્રક્રિયા ઝડપી તથા સરળ બનશે. તેનાથી ઉદ્યોગ જગતનો વિશ્વાસ વધશે, રોકાણને પ્રોત્સાહન મળશે અને ‘વિકસિત ભારત’ના લક્ષ્યને વધુ મજબૂત આધાર મળશે.

પ્રધાનમંત્રી કાર્યાલયે PM મોદીને ટાંકીને આ માહિતી આપી હતી. તેમણે નાણામંત્રી નિર્મલા સીતારમણના આગામી તબક્કાના GST સુધારા અંગેના લેખનો ઉલ્લેખ કરતાં કહ્યું કે, નવી પેઢીના GST સુધારા કર પ્રણાલીને વધુ સરળ, પારદર્શક અને અનુમાનિત બનાવી રહ્યા છે, જેનાથી વેપારીઓ અને પરિવારો બંનેને લાભ થઈ રહ્યો છે.

નાણામંત્રી નિર્મલા સીતારમણે સોશિયલ મીડિયા પ્લેટફોર્મ ‘X’ પર કહ્યું કે, NEXT-GEN GSTનો હેતુ કરદાતાઓને રાહત આપવા અને અર્થવ્યવસ્થાને ગતિ આપવાનો છે. આગામી સુધારામાં GST રજિસ્ટ્રેશન, રિટર્ન ફાઇલિંગ, રિફંડ, વિવાદ નિવારણ અને ઇનપુટ ટેક્સ ક્રેડિટ (ITC)ની પ્રક્રિયાને સરળ બનાવવા પર મુખ્ય ધ્યાન રહેશે.

GST કાઉન્સિલની 7 ઓક્ટોબરે બેઠક

GST કાઉન્સિલની 7 ઓક્ટોબરે યોજાનારી બેઠક પહેલાં નાણામંત્રીએ કહ્યું કે, પ્રક્રિયાગત સુધારાનો હેતુ કરદાતાઓના અનુપાલનમાં લાગતા સમય અને ખર્ચને ઘટાડવાનો છે. સરકારનો ઉદ્દેશ વેપારીઓને ઓછી કાગળપત્રની કાર્યવાહી સાથે વધુ સુવિધા આપવાનો છે.

નાણામંત્રીએ સપ્ટેમ્બર 2025માં અમલમાં આવેલી GST દર તર્કસંગતીકરણ પ્રક્રિયા બાદ GST વસૂલાત અને કરપાત્ર સપ્લાયના પ્રદર્શનનો પણ ઉલ્લેખ કર્યો.

GST ધરપકડની જોગવાઈ પર પણ ચર્ચા શક્ય

આગામી GST કાઉન્સિલની બેઠકમાં એક મહત્વપૂર્ણ કાનૂની મુદ્દા પર પણ ચર્ચા થઈ શકે છે. સૂત્રોના જણાવ્યા અનુસાર, GST કાયદામાં તપાસ દરમિયાન કર અધિકારીઓને કરદાતાની ધરપકડ કરવાની સત્તા આપતી જોગવાઈ દૂર કરવી કે નહીં તે અંગે વિચારણા થઈ શકે છે.

આ સૂચન GST કાઉન્સિલની લૉ કમિટી દ્વારા GST કાયદાના અપરાધીકરણને ઘટાડવાના વ્યાપક પ્રસ્તાવના ભાગરૂપે આપવામાં આવ્યું છે. કમિટીનું માનવું છે કે અનેક કિસ્સામાં કર ચુકવણીમાં થયેલી ચૂક ઇરાદાપૂર્વકની હોતી નથી અને આવા કિસ્સામાં ધરપકડ જેવા કડક પગલાંની જરૂરિયાત ન હોઈ શકે.

ગંભીર કેસમાં કાર્યવાહી ચાલુ રહેશે

હાલની વ્યવસ્થા હેઠળ CGST અધિનિયમની કલમ 69 મુજબ, જો કમિશનરને વિશ્વાસ હોય કે કોઈ વ્યક્તિએ કલમ 132 હેઠળ ગંભીર ગુનો કર્યો છે, તો તેઓ ધરપકડની મંજૂરી આપી શકે છે... જોકે, પ્રસ્તાવિત વિચાર મુજબ નકલી ઇનવૉઇસ, નકલી ITC અને નકલી રિફંડના દાવા જેવા ગંભીર કેસમાં ભારતીય ન્યાય સંહિતા (BNS) સહિતના સામાન્ય ફોજદારી કાયદા હેઠળ કાર્યવાહી કરી શકાય છે.... આ ફેરફારથી ઈમાનદાર કરદાતાઓ માટે વેપારનું વાતાવરણ વધુ સરળ અને અનુકૂળ બની શકે છે.