PM મોદીએ દોસ્ત પુતિનને શ્રીમદ્ ભગવત ગીતાની આપી ભેટ

રશિયાના રાષ્ટ્રપતિ વ્લાદિમીર પુતિન બે દિવસીય ભારત પ્રવાસે છે. વડાપ્રધાન નરેન્દ્ર મોદીએ તેમના ભરોસાપાત્ર મિત્ર રાષ્ટ્રપતિ પુતિનનું ભવ્ય સ્વાગત કર્યું અને તેમને રશિયન ભાષામાં અનુવાદિત શ્રીમદ્ભગવદ્ ગીતાની એક નકલ ભેટ આપી. શ્રીમદ્ભગવદ્ ગીતાની શિક્ષાઓ વિશ્વભરના લાખો લોકોને પ્રેરણા આપે છે.

વડાપ્રધાન મોદી દ્વારા રાષ્ટ્રપતિ પુતિનને શ્રીમદ્ભગવદ્ ગીતા ભેટ આપવી, તેમનો ભારતીય સાહિત્ય, અધ્યાત્મ અને ભાષાઓ પ્રત્યેનો લગાવ દર્શાવે છે. આ અંગે સોશિયલ મીડિયા પ્લેટફોર્મ X પર 'ધ મોદી સ્ટોરી' દ્વારા એક વિડિયો શેર કરવામાં આવ્યો, જેમાં સાહિત્ય અકાદમીના પૂર્વ સચિવ ડૉ. કે શ્રીનિવાસ રાવ જણાવી રહ્યા છે કે વડાપ્રધાન નરેન્દ્ર મોદી ભારતીય સાહિત્ય અને સંસ્કૃતિને કેવી રીતે વૈશ્વિક સંવાદમાં લાવે છે. શ્રીનિવાસ રાવે જણાવ્યું કે 2019માં SCO દેશોની ભાષાઓમાં ભારતીય સાહિત્યના અનુવાદની જાહેરાતથી લઈને રશિયન રાષ્ટ્રપતિ વ્લાદિમીર પુતિનને તેમની ભારત યાત્રા દરમિયાન રશિયન ભાષામાં શ્રીમદ્ભગવદ્ ગીતા ભેટ આપવા સુધી, વડાપ્રધાન નરેન્દ્ર મોદીએ સતત ભારતના જ્ઞાનને સરહદોથી આગળ પહોંચાડ્યું છે.

તેમણે કહ્યું કે વડાપ્રધાનના આ પગલાએ ભારતની સાહિત્યિક અને આધ્યાત્મિક વિરાસતને વૈશ્વિક સંવાદમાં લાવીને દર્શાવ્યું છે કે સાહિત્ય અને આધ્યાત્મિક ગ્રંથો તેમના રાજદ્વારી જોડાણનો કેટલો મહત્વપૂર્ણ ભાગ છે. તેમણે કહ્યું કે જ્યારે 2019માં કિર્ગિસ્તાનની રાજધાની બિશ્કેકમાં SCO શિખર સંમેલન થયું હતું, ત્યારે વડાપ્રધાન નરેન્દ્ર મોદીએ દસ આધુનિક ભારતીય સાહિત્યિક કૃતિઓનું SCO દેશોની ભાષાઓમાં અનુવાદ કરવાનો વિચાર રજૂ કર્યો હતો જેથી આ દેશોના વાચકો સીધા ભારતીય લેખન સુધી પહોંચી શકે. બાદમાં, મંત્રાલયો અને ભારતીય દૂતાવાસોએ આ યોજનાને આગળ વધારવા માટે ભાષાકીય અને સંપાદકીય નિષ્ણાતો સાથે મળીને, ખાસ કરીને રશિયન, ચીની અને અંગ્રેજીમાં, અનુવાદોનું સંકલન કર્યું.

તેમણે કહ્યું કે SCO દેશો માટે અનુવાદિત પુસ્તકો અને રાષ્ટ્રપતિ પુતિનને ભેટમાં આપવામાં આવેલી શ્રીમદ્ભગવદ્ ગીતાનો રશિયન અનુવાદ, બંને મળીને આ વાત પર પ્રકાશ પાડે છે કે વડાપ્રધાન નરેન્દ્ર મોદી કઈ રીતે ભારતીય સાહિત્ય અને સંસ્કૃતિને વૈશ્વિક સંવાદમાં લાવે છે. પછી ભલે તે આધુનિક રચનાઓ દ્વારા હોય કે શાશ્વત આધ્યાત્મિક ગ્રંથો દ્વારા, તેઓ એ સુનિશ્ચિત કરે છે કે ભારતની વાર્તાઓ, વિચારો અને જ્ઞાન સીમાઓથી આગળ પહોંચે અને શબ્દોની શક્તિ દ્વારા રાષ્ટ્રોને જોડે.