UNSCમાં કાયમી સભ્યપદ મેળવવાને લઈ વિદેશમંત્રી એસ.જયશંકરએ વ્યક્ત કર્યો વિશ્વાસ

વિદેશ પ્રધાન ડૉ. એસ. જયશંકરે મંગળવારે જણાવ્યું હતું કે, તેમને વિશ્વાસ છે કે ભારત સંયુક્ત રાષ્ટ્ર સુરક્ષા પરિષદ (UNSC)માં કાયમી સભ્યપદ મેળવશે, જોકે તેમણે સ્વીકાર્યું કે તેના માટે "વધારાની મહેનત"ની જરૂર પડશે.

રાજકોટમાં એક કાર્યક્રમમાં એસ.જયશંકરે કહ્યું, “અમે ચોક્કસ કાયમી સભ્યપદ મેળવીશું. પરંતુ મહેનત વગર કોઈ મોટી સિદ્ધિ મળતી નથી. તેથી, આપણે તેના માટે સખત મહેનત કરવી પડશે."
આ વખતે, આપણે વધુ પ્રયત્નો કરવા પડશે કારણ કે અત્યાર સુધી જે બન્યું છે તે એ છે કે UN ની રચના લગભગ 80 વર્ષ પહેલાં થઈ હતી. તે સમયે, પાંચ રાષ્ટ્રો હતા જેમણે નક્કી કર્યું હતું કે તેઓ UN સુરક્ષા પરિષદના કાયમી સભ્યો બનશે."

જયશંકરે  UNSCના વર્તમાન સ્થાયી પાંચ સભ્યોને કાઉન્સિલના વિસ્તરણ અંગેના નિર્ણયો લેવા દેવાની અન્યાયીતા પર પ્રકાશ પાડ્યો હતો.

"આ સિસ્ટમ બદલવી જોઈએ, અને ભારતને UNSCમાં કાયમી બેઠક મળવી જોઈએ," તેમણે કહ્યું.

“હાલના દિવસોમાં ઘણા  બધા દેશો સાથે વાતચીત ચાલી રહી છે. વિવિધ વિચારો આગળ મૂકવામાં આવ્યા છે. કેટલાક આરબ દેશો, આફ્રિકન દેશો દ્વારા. અમે જાપાન, જર્મની અને બ્રાઝિલ સાથે મળીને પણ એક પ્રસ્તાવ મૂક્યો છે. મને લાગે છે કે આપણે આ સાથે સતત રહેવું જોઈએ, ”જયશંકરે કહ્યું.