ગાંધીનગરના કુડાસણ ખાતે 'ગરવી ગુર્જરી'ના અદ્યતન નવા શોરૂમનું ભવ્ય ઉદ્ઘાટન

ગાંધીનગરના કુડાસણ ખાતે 'ગરવી ગુર્જરી'ના અદ્યતન નવા શોરૂમનું ભવ્ય ઉદ્ઘાટન: મંત્રી નરેશ પટેલની ઉપસ્થિતિમાં કલાકારો અને કારીગરોને મળશે નવી તકો

ગુજરાતની સમૃદ્ધ સાંસ્કૃતિક વારસાને વધુ વ્યાપક પ્લેટફોર્મ પૂરું પાડવા માટે ગાંધીનગરના કુડાસણ ખાતે ખાદી, કુટીર અને ગ્રામોદ્યોગ મંત્રી નરેશ પટેલના હસ્તે ‘ગરવી ગુર્જરી’ના અત્યાધુનિક અને નવા શોરૂમનું ભવ્ય ઉદ્ઘાટન કરવામાં આવ્યું છે. આ અદ્યતન શોરૂમ દ્વારા ગુજરાતની પરંપરાગત ઓળખ સમાન હસ્તકળા અને હેન્ડલૂમ ઉદ્યોગને નવું પ્રોત્સાહન મળશે.

શોરૂમની વિશેષતાઓ અને ઉપલબ્ધ કલાકૃતિઓ

આ નવા શોરૂમમાં ગુજરાતની હરહંમેશ લોકપ્રિય રહેલી પરંપરાગત ચીજવસ્તુઓ એક જ છત નીચે ઉપલબ્ધ કરાવવામાં આવી છે. ગુજરાતની અનોખી હાથશાળ, હસ્તકળા, માટીકામ અને ગૃહ સુશોભનની આકર્ષક કલાત્મક ચીજવસ્તુઓ,  રાજ્યના વિવિધ વિસ્તારોની આદિવાસી કલાની વિશિષ્ટ કૃતિઓ પણ ગ્રાહકો માટે ખરીદી અર્થે મૂકવામાં આવી છે.

'વોકલ ફોર લોકલ' મંત્રને વેગ

પ્રધાનમંત્રી નરેન્દ્ર મોદીના ‘વોકલ ફોર લોકલ’ના આહ્વાનને સાર્થક કરતી આ દિશામાં એક મહત્વપૂર્ણ પગલું છે. આ પહેલથી પાટણ, કચ્છ તેમજ રાજ્યના અન્ય દુરસ્થ વિસ્તારોના સ્થાનિક કારીગરોની અદભુત કળાને માત્ર રાષ્ટ્રીય જ નહીં પરંતુ વૈશ્વિક બજાર અને નવી ઓળખ પ્રાપ્ત થશે.

મંત્રી નરેશ પટેલે આ પ્રસંગે જણાવ્યું હતું કે આ પ્રકારના અદ્યતન શોરૂમ શરૂ થવાથી સ્થાનિક કારીગરો અને શિલ્પીઓને વ્યાપક રોજગારીની તકો મળશે અને તેઓ આત્મનિર્ભર બનશે. સાથે જ, ગુજરાતની સમૃદ્ધ કલા અને સંસ્કૃતિ દેશ-વિદેશના પ્રવાસીઓ અને નાગરિકો સુધી સરળતાથી પહોંચી શકશે.