રાજકોટના રણજીત વિલાસ પેલેસ ખાતે ભગિની સેવા ફાઉન્ડેશન દ્વારા ભવ્ય તલવાર રાસનું આયોજન

રાજકોટના રણજીત વિલાસ પેલેસ ખાતે ભગિની સેવા ફાઉન્ડેશન દ્વારા ભવ્ય તલવાર રાસનું આયોજન: ક્ષત્રિય બહેનોએ રજૂ કર્યા સાહસિક કરતબો

નવરાત્રિના પાવન અવસરે રાજકોટના રણજીત વિલાસ પેલેસ ખાતે ક્ષત્રિય સમાજ દ્વારા એક અનોખો અને ઉત્સાહવર્ધક સાંસ્કૃતિક ઉત્સવ યોજાયો હતો. ભગિની સેવા ફાઉન્ડેશનના ઉપક્રમે અને મહારાણી કાદંબરીદેવીના માર્ગદર્શન હેઠળ યોજાયેલા આ કાર્યક્રમમાં ક્ષત્રિય સમાજની બહેનોએ ભારે ઉત્સાહ સાથે ભાગ લીધો હતો.

પરંપરાગત તલવાર રાસ અને સાહસિક કરતબો: 

આ વિશેષ આયોજનમાં બહેનોએ પરંપરાગત વસ્ત્રપહેરવેશમાં સજ્જ થઈને શૌર્ય અને કલાનું અદ્ભુત પ્રદર્શન કર્યું હતું. માત્ર જમીન પર જ નહીં, પરંતુ ઉત્સાહી બહેનો દ્વારા બાઈક અને જીપ પર સવાર થઈને તલવારના રોમાંચક કરતબો પણ રજૂ કરવામાં આવ્યા હતા, જેને ઉપસ્થિત જનમેદનીએ ભારે વધાવ્યા હતા.

શક્તિ અને સંસ્કૃતિનો સંગમ: 

કાર્યક્રમ વિશે વાત કરતા આયોજકોએ જણાવ્યું હતું કે આ ઉત્સવનો મુખ્ય ઉદ્દેશ્ય આપણી પ્રાચીન સંસ્કૃતિ, વીરતા અને નારી શક્તિને ઉજાગર કરવાનો છે. મહારાણી કાદંબરીદેવીના માર્ગદર્શન હેઠળ યોજાયેલા આ ભવ્ય આયોજનને નિહાળવા માટે રાજકોટ તેમજ આસપાસના વિસ્તારોમાંથી મોટી સંખ્યામાં લોકો રણજીત વિલાસ પેલેસ ખાતે ઉમટી પડ્યા હતા.

સાહસ, શૌર્ય અને પરંપરાના આ અનોખા સંગમે નવરાત્રિના રંગોમાં અનેકગણો વધારો કરી દીધો હતો અને આ કાર્યક્રમ નગરજનોમાં ભારે આકર્ષણનું કેન્દ્ર બન્યો હતો.