ઈંગ્લેન્ડમાં ચમક્યો કેએલ રાહુલ, 1000 ટેસ્ટ રન બનાવનાર બન્યો પાંચમો ભારતીય બેટ્સમેન

ભારતીય ક્રિકેટ ટીમના અનુભવી બેટ્સમેન કેએલ રાહુલ ઈંગ્લેન્ડ સામે રમાઈ રહેલી ટેસ્ટ શ્રેણીમાં ઓપનર તરીકે શાનદાર બેટિંગ કરી રહ્યા છે. રાહુલ આ શ્રેણીમાં શાનદાર ફોર્મમાં છે. રાહુલે માન્ચેસ્ટરના ઓલ્ડ ટ્રેફોર્ડ ખાતે ઈંગ્લેન્ડ સામે રમાઈ રહેલી ચોથી ટેસ્ટમાં શાનદાર સિદ્ધિ હાંસલ કરી.

ચોથી ટેસ્ટના પહેલા સત્રની સાતમી ઓવરમાં, રાહુલે ક્રિસ વોક્સના બોલ પર ફોર ફટકારીને ઈંગ્લેન્ડની ધરતી પર 1000 ટેસ્ટ રન પૂર્ણ કર્યા. કેએલ રાહુલ પહેલા, સચિન તેંડુલકર (૧,૫૭૫ રન), રાહુલ દ્રવિડ (૧,૩૭૬ રન), સુનીલ ગાવસ્કર (૧,૧૫૨ રન) અને વિરાટ કોહલી (૧,૦૯૬ રન) આ સિદ્ધિ મેળવી ચૂક્યા છે.

કેએલ રાહુલે પહેલી વાર 1018માં ઈંગ્લેન્ડનો પ્રવાસ કર્યો હતો અને ૫ ટેસ્ટ શ્રેણીમાં 299 રન બનાવ્યા હતા. 2021 માં ઈંગ્લેન્ડના પોતાના બીજા પ્રવાસમાં, તેમણે 4 ટેસ્ટમાં 315 રન બનાવ્યા. તેમનો હાલનો પ્રવાસ સૌથી સફળ રહ્યો છે. આ પ્રવાસમાં, તેમણે 4 ટેસ્ટની 7 ઈનિંગ્સમાં 421 રન બનાવ્યા છે, જેમાં 2 સદી અને એક અડધી સદી ફટકારી છે. ચોથી ટેસ્ટની પહેલી ઇનિંગ્સમાં તેઓ 46 રન બનાવીને આઉટ થયા હતા.

રાહુલે ઈંગ્લેન્ડમાં 4 સદી ફટકારી છે. રાહુલ દ્રવિડ (૬ સદી) પછી તે ઈંગ્લેન્ડમાં સૌથી વધુ સદી ફટકારનાર બીજા બેટ્સમેન છે. માન્ચેસ્ટર ટેસ્ટ પહેલા, કેએલ રાહુલે ૬૧ ટેસ્ટમાં ૩,૬૩૨ રન બનાવ્યા છે, જેમાં ૧૦ સદી અને ૧૮ અડધી સદી ફટકારી છે.

કેએલ રાહુલ છેલ્લા કેટલાક સમયથી માત્ર ટેસ્ટમાં જ નહીં પરંતુ ટી-20 અને ઓડીઆઈ ફોર્મેટમાં પણ શાનદાર ફોર્મમાં છે. ચેમ્પિયન્સ ટ્રોફીમાં ભારત માટે ઘણી મહત્વપૂર્ણ ઇનિંગ્સ રમ્યા બાદ, તેમણે આઈપીએલમાં પણ શાનદાર બેટિંગ કરી. ઓસ્ટ્રેલિયા પ્રવાસ પર તેઓ બેટ્સમેન તરીકે પણ અસરકારક રહ્યા.

રાહુલે માત્ર ઓપનર તરીકે જ નહીં પરંતુ અલગ અલગ સ્થાનો પર બેટિંગ કરીને પણ ટીમ માટે મહત્વપૂર્ણ ઇનિંગ્સ રમી છે. ઈંગ્લેન્ડમાં, તેને જયસ્વાલ સાથે ઇનિંગ્સ ખોલવાની જવાબદારી સોંપવામાં આવી છે અને તે તેમાં સફળ રહ્યો છે.