એશિયન કુસ્તી ચેમ્પિયનશિપમાં લલિતે ચીની પહેલવાનને પછાડી ફાઈનલમાં પ્રવેશ કર્યો

કિર્ગિસ્તાનની રાજધાની બિશ્કેક ખાતે રમાઈ રહેલી એશિયન કુસ્તી ચેમ્પિયનશિપ ૨૦૨૬ના પ્રથમ દિવસે ભારતના ૨૩ વર્ષીય યુવા કુસ્તીબાજ લલિતે આક્રમક દેખાવ કરીને ૫૫ કિગ્રા ગ્રીકો-રોમન કેટેગરીની ફાઈનલમાં પ્રવેશ મેળવી લીધો છે. લલિતના આ શાનદાર પ્રદર્શનથી ભારત માટે ગોલ્ડ મેડલની આશા જીવંત થઈ છે.

કિર્ગિસ્તાનની રાજધાની બિશ્કેક ખાતે રમાઈ રહેલી એશિયન કુસ્તી ચેમ્પિયનશિપ 2026ના પ્રથમ દિવસે ભારતના 23 વર્ષીય યુવા કુસ્તીબાજ લલિતે આક્રમક દેખાવ કરીને 55 કિગ્રા ગ્રીકો-રોમન કેટેગરીની ફાઈનલમાં પ્રવેશ મેળવી લીધો છે. લલિતના આ શાનદાર પ્રદર્શનથી ભારત માટે ગોલ્ડ મેડલની આશા જીવંત થઈ છે.

લલિતની 'ગોલ્ડન' સફર
સેમીફાઈનલના જંગમાં લલિતે ચીનના મજબૂત પ્રતિસ્પર્ધી હુઓઇંગ શી ને હંફાવ્યો હતો. લલિતે શરૂઆતથી જ મેટ પર પ્રભુત્વ જાળવી રાખ્યું હતું અને ચીની પહેલવાનને ૧૧-૩ ના વિશાળ અંતરથી મ્હાત આપી હતી. આ અગાઉ ક્વાર્ટર ફાઈનલમાં પણ લલિતે જાપાનના મિઝુકી અરાકીને 9-8થી હરાવીને પોતાની તાકાતનો પરિચય આપ્યો હતો. હવે ફાઈનલમાં લલિતનો સામનો ઉઝબેકિસ્તાનના મજબૂત ખેલાડી અને ૨૦૨૫ના એશિયન મેડલિસ્ટ ઇખ્તિયોર બોતિરોવ સામે થશે.

અમન અને સુનીલ કુમાર બ્રોન્ઝની રેસમાં
બીજી તરફ, ભારત માટે દિવસ મિશ્ર રહ્યો હતો. 77 કિગ્રા ગ્રીકો-રોમન કેટેગરીની સેમીફાઈનલમાં અમન ને ઈરાનના અલી ઓસ્કોઉ સામે 13-3થી હારનો સામનો કરવો પડ્યો હતો. જોકે, અમન હજુ પણ મેડલની રેસમાં છે અને તે હવે બ્રોન્ઝ મેડલ માટે દક્ષિણ કોરિયાના યોંગહુન નોહ સામે ટકરાશે. આવી જ રીતે, 87 કિગ્રા કેટેગરીમાં ભારતના પૂર્વ એશિયન ચેમ્પિયન સુનીલ કુમાર પણ સેમીફાઈનલમાં ઈરાનના ઘોલામરેઝા ફારોખીસેંજાની સામે 0-8થી પરાજિત થયા હતા. સુનીલ કુમાર પણ હવે બ્રોન્ઝ મેડલ જીતવા માટે મેદાનમાં ઉતરશે.

આગામી પડકારો
ગ્રીકો-રોમન શૈલીમાં લલિતની ફાઈનલ અને અન્યોની બ્રોન્ઝ મેડલ મેચો મંગળવારે રમાશે. આ સાથે જ ભારતના અન્ય પાંચ ગ્રીકો-રોમન કુસ્તીબાજો - સાહિલ (60 કિગ્રા), સચિન સેહરાવત (67 કિગ્રા), અનિલ (72 કિગ્રા), પ્રિન્સ (82 કિગ્રા) અને નિતેશ (97 કિગ્રા) પણ મેદાનમાં ઉતરશે. ભારતીય કુસ્તી પ્રેમીઓની નજર હવે લલિત પર ટકેલી છે. જો તે ફાઈનલમાં વિજય મેળવશે, તો તે એશિયન કુસ્તીમાં ભારતનું નામ સુવર્ણ અક્ષરે અંકિત કરશે.