બ્રાયન બેનેટ દક્ષિણ આફ્રિકા સામે ચાલી રહેલી ટેસ્ટમાંથી બહાર

ઝિમ્બાબ્વેના ઓપનર બ્રાયન બેનેટને ઈજાના કારણે ક્વીન્સ સ્પોર્ટ્સ ક્લબ ખાતે દક્ષિણ આફ્રિકા સામે ચાલી રહેલી ટેસ્ટ મેચમાંથી બહાર કરવામાં આવ્યા છે. ઝિમ્બાબ્વે ક્રિકેટે જણાવ્યું હતું કે બેનેટના સ્થાને પ્રિન્સ માસ્વોરનો ટીમમાં સમાવેશ કરવામાં આવ્યો છે. માસ્વોર તેનો 10મો મેચ રમશે.

ઝિમ્બાબ્વેની ઇનિંગ્સના છઠ્ઠા ઓવરના છેલ્લા બોલ પર બ્રાયન બેનેટ ઘાયલ થયો હતો. દક્ષિણ આફ્રિકાના ડાબા હાથના બોલર મ્ફાકાનો બોલ બેનેટના હેલ્મેટમાં વાગ્યો હતો. ઈજા પછી બેનેટ થોડા સમય માટે મેદાન પર રહ્યો. પરંતુ, આઠમી ઓવરમાં ફક્ત ત્રણ બોલ રમ્યા પછી તે નિવૃત્ત થયો. તેના પ્રારંભિક કન્કશન ટેસ્ટમાં કોઈ ગંભીર લક્ષણો જોવા મળ્યા ન હતા. મેડિકલ ટીમ દ્વારા વિગતવાર તપાસમાં હળવી કન્કશન હોવાનું બહાર આવ્યું છે. ICCના કન્કશન પ્રોટોકોલ હેઠળ, તે બાકીની ટેસ્ટ મેચમાં ભાગ લેશે નહીં. ઝિમ્બાબ્વે ક્રિકેટે રવિવારે એક નિવેદનમાં જણાવ્યું હતું કે, "ઓપનર બ્રાયન બેનેટ નાની ઈજાને કારણે બુલાવાયોના ક્વીન્સ સ્પોર્ટ્સ ક્લબ ખાતે દક્ષિણ આફ્રિકા સામે ચાલી રહેલી બાકીની ટેસ્ટ મેચમાં ભાગ લઈ શકશે નહીં."

બ્રાયન બેનેટના સ્થાને પ્રિન્સ માસવૌરને પ્લેઇંગ ઇલેવનમાં તક આપવામાં આવી  

વહેલી સવારે, દક્ષિણ આફ્રિકાએ 418/9 ના સ્કોર પર પોતાનો પહેલો દાવ જાહેર કર્યો. દક્ષિણ આફ્રિકા માટે ડેબ્યૂ કરી રહેલા 19 વર્ષીય વિકેટકીપર-બેટ્સમેન લુઆન ડ્રે પ્રિટોરિયસે 153 રનની શાનદાર ઇનિંગ રમી, જ્યારે આઠમા ક્રમે બેટ્સમેન કોર્બિન બોશે તેની પ્રથમ ટેસ્ટ સદી ફટકારી અને 100 રન બનાવીને અણનમ રહ્યો.

પ્રિટોરિયસ દક્ષિણ આફ્રિકા માટે ટેસ્ટમાં સદી ફટકારનાર સૌથી નાની ઉંમરનો બેટ્સમેન બન્યો, જ્યારે ડેબ્યૂ પર ટેસ્ટમાં સદી ફટકારનાર પોતાના દેશનો સાતમો બેટ્સમેન બન્યો.