ભારતે રોમાંચક મેચમાં દક્ષિણ આફ્રિકાને 11 રને હરાવ્યું

દક્ષિણ આફ્રિકાને જીતવા માટે 220 રનનો ટાર્ગેટ હતો, પરંતુ દક્ષિણ આફ્રિકાની ટીમ 20 ઓવરમાં 7 વિકેટે 208 રન જ બનાવી શકી હતી. આ રીતે ભારત 11 રને જીત્યું

ભારતે સાઉથ આફ્રિકા સામે ત્રીજી ટી20 જીતી લીધી છે. 4 મેચોની સીરિઝમાં ભારત 2-1થી આગળ નીકળી ગયું છે. આ મેચમાં અંતિમ ઓવરોમાં અર્શદીપની બોલિંગ ટર્નિગ પોઈન્ટ સાબિત થઈ હતી. જેમાં ક્લાસન અને માર્કોની વિકેટનો સમાવેશ થાય છે.

ભારત અને સાઉથ આફ્રિકા વચ્ચે સેન્ચ્યુરિયનના સુપરસ્પોર્ટ્સ પાર્કમાં રમાયેલી ત્રીજી ટી20માં ભારતે બાજી મારી લીધી છે. ભારતે સાઉથ આફ્રિકાને 220 રનનો ટાર્ગેટ આપ્યા બાદ છેલ્લી ઓવર સુધી પહોંચેલી મેચ 11 રનથી જીતી લીધી હતી. આ મેચમાં તિલક વર્માની શાનદાર ઈનિંગ્સ બાદ અર્શદીપની ધારદાર બોલિંગે સાઉથ આફ્રિકાના હાથમાં જતી મેચની બાજી પલટી નાખી હતી. આ મેચમાં ઓલ-રાઉન્ડર રમનદીપ સિંહે 6 બોલનો સામનો કરીને 15 રન બનાવ્યા હતા, જે મેચના પરિણામ દરમિયાન મહત્વનું યોગદાન સાબિત થયું હતું.

ભારત-સાઉથ આફ્રિકા બન્ને ટીમો ટી20 વર્લ્ડ કપની ફાઈનલમાં આમને સામને થયા બાદ પહેલી સીરિઝ રમી રહી છે. 4 ટી20 મેચની સીરિઝમાં ભારત 2-1થી આગળ છે, ત્રીજી ટી20માં સંજુ સેમસન, સૂર્યકુમાર યાદવ અને રિંકુ સિંઘનો ફ્લોપ શો રહ્યો હતો. પરંતુ તિલક વર્મા (107) અને અભિષેક શર્મા (50)ની શાનદાર બેટિંગના કારણે ભારતીય ટીમ સ્કોરને 200ને પાર પહોંચાડી શકી હતી. 

આ મેચમાં ટર્નિંગ પોઈન્ટ અર્શદીપની બોલિંગ રહ્યો હતો, જેણે સૌથી પહેલા રયાન રિકેલ્ટોનને પેવેલિયન ભેગો કર્યા પછી મેચની 18મી ઓવરમાં હેનરી ક્લાસન (22 બોલમાં 41 રન) અને અંતિમ ઓવરના ત્રીજા બોલ પર માર્કો જાન્સેન (17 બોલમાં 54 રન)ની વિકેટ લઈને આખી બાજી પલટી નાખી હતી. આ બન્ને ખેલાડીઓમાં ક્લાસન 185થી વધુની અને માર્કો 300+ની સ્ટ્રાઈક રેટથી બેટિંગ કરી રહ્યા હતા, જેના કારણે ભારતના હાથમાંથી મેચ સરકી રહી હતી.

પરંતુ આ બન્ને સ્ફોટક સાબિત થયેલા બેટ્સમેનોની વિકેટ લઈને અર્શદીપને આખી બાજી પલટી નાખી હતી. આ મેચમાં સાઉથ આફ્રિકાએ ટોસ જીતીને બેટિંગનો નિર્ણય લીધો હતો. જેમાં તિલક વર્મા અને અભિષેક શર્માએ 200ની સ્ટ્રાઈક રેટથી તોફાની બેટિંગ કરીને ભારતનો સ્કોર 200ને પાર પહોંચાડ્યો હતો. સાઉથ આફ્રિકા તરફથી સિમેલન અને મહારાજને 2-2 જ્યારે માર્કોને 1 વિકેટ મળી હતી.

ભારત તરફથી અર્શદીપને રિકેલ્ટન, ક્લાસન અને માર્કોના સ્વરુપમાં મહત્વની ત્રણ વિકેટ અપાવી હતી, જ્યારે વરુણ ચક્રવર્તિએ 2 અને હાર્દિક-અક્ષરને 1-1 વિકેટ મળી હતી. હવે ભારત અને સાઉથ આફ્રિકા વચ્ચે અંતિમ ટી20 15મી નવેમ્બરે રમાશે. જો આ મેચ ભારત જીતે છે તો સીરિઝ પર કબજો કરી લેશે અને સાઉથ આફ્રિકાની જીત થાય તો સીરિઝ ડ્રો રહેશે.