મનુ ભાકર પેરિસ ઓલિમ્પિકના સમાપન સમારોહમાં ભારતની ધ્વજવાહક બનશે

ઓપનિંગ સેરેમનીમાં સ્ટાર બેડમિન્ટન ખેલાડી પીવી સિંધુ અને અનુભવી ટેબલ ટેનિસ ખેલાડી શરથ કમલને પરેડ ઓફ નેશન્સમાં ફ્લેગ બેરર બનાવવામાં આવ્યા હતા

પેરિસ ઓલિમ્પિકમાં બે બ્રોન્ઝ મેડલ જીતનાર શૂટર મનુ ભાકરને ઓલિમ્પિક ગેમ્સના સમાપન સમારોહમાં ભારતના ધ્વજવાહક તરીકે પસંદ કરવામાં આવ્યા છે. ફ્રાન્સની રાજધાનીમાં 11 ઓગસ્ટે સમાપન સમારોહ યોજાશે. મનુએ એક જ ઓલિમ્પિકમાં બે બ્રોન્ઝ મેડલ જીતીને ઈતિહાસ રચ્યો છે. આ પરાક્રમ આઝાદી બાદ પ્રથમ વખત કોઈ ભારતીય એથ્લેટ દ્વારા નોંધવામાં આવ્યું છે.

હરિયાણાની 22 વર્ષની મનુએ મહિલાઓની 10 મીટર એર પિસ્તોલ સ્પર્ધામાં બ્રોન્ઝ મેડલ જીતીને ભારત માટે મેડલનું ખાતું ખોલાવ્યું હતું. આ પછી તેણે સરબજીત સિંહ સાથે મળીને 10 મીટર એર પિસ્તોલ મિક્સ્ડ ટીમ ઈવેન્ટમાં બીજો બ્રોન્ઝ મેડલ જીત્યો. તે શનિવારે મહિલાઓની 25 મીટર પિસ્તોલ સ્પર્ધામાં ચોથા સ્થાને રહીને બ્રોન્ઝ મેડલ મેળવવાથી સહેજે ચૂકી ગઈ હતી.

"IOA પ્રમુખ ડૉ પીટી ઉષા અને મુખ્ય ટીમના પ્રતિનિધિ ગગન નારંગે જાહેરાત કરી છે કે પિસ્તોલ શૂટર મનુ ભાકર સમાપન સમારોહમાં ભારતના ધ્વજ વાહક હશે. પુરૂષ ધ્વજ ધારકની પસંદગી પછીથી કરવામાં આવશે," ભારતીય ઓલિમ્પિક સંઘે જણાવ્યું હતું.

આ પહેલા સ્ટાર બેડમિન્ટન ખેલાડી પીવી સિંધુ અને અનુભવી ટેબલ ટેનિસ ખેલાડી શરથ કમલને ઓપનિંગ સેરેમનીમાં પરેડ ઓફ નેશન્સમાં ફ્લેગ બેરર બનાવવામાં આવ્યા હતા.