મલેશિયા ઓપન બેડમિન્ટન ટુર્નામેન્ટમાં લક્ષ્યસેન આજે પોતાનો દાવો રજૂ કરશે

મલેશિયા ઓપન બેડમિન્ટન ટુર્નામેન્ટમાં લક્ષ્યસેન આજે પોતાનો દાવો રજૂ કરશે. લક્ષ્યસેન આજે ચીનના વેંગ હોંગ યાંગ સાથે બાથ ભીડશે એસ.એચ.પ્રણોયનો સામનો ડેનમાર્કના એડર્સ એટર્સન સાથે થશે તો પુરુષ યુગલમાં ચિરાગ શેટ્ટી અને સાત્વિક સાઈરાજ કીરેડ્ડીની જોડીનો સામનો મોહમ્મદ શોહેબ ઉલ-ફિક્રી અને બગાસ મોલાનાની ઈન્ડોનેશિયન જોડી સાથે થશે. કાલે રમાયેલ રોમાંચક મેચમાં ભારતના કિદાંબી શ્રીકાંતે વાપસી કરતા દુનિયાના પાંચમાં નંબરના ખેલાડી ઈન્ડોનેશિયાના જોનાથન ક્રિસ્ટીને હરાવી બીજા રાઉન્ડમાં જગ્યા બનાવી હતી.

શ્રીકાંતે એક કલાક પાંચ મિનિટના પ્રથમ મુકાબલામાં ક્રિસ્ટીને 12-21, 21-18, 21-16થી હરાવ્યો હતો. દુનિયાના પૂર્વ નંબર એક ખેલાડી શ્રીકાંત આગળની મેચમાં હોંગકોંગના એન્ટીકા લોંગ એંગસ સાથે ટક્કર લેશે. તો તનીષા ક્રાસ્ટો અને અશ્વિની પોનપ્પાની ભારતીય જોડીએ ફ્રાંસીસ કાર્બેટ અને એલિસન લીની અમેરિકન જોડીને 21-13, 21-16થી હરાવી બીજા રાઉન્ડમાં જગ્યા બનાવી હતી. ભારતીય જોડી સામે આગળની મેચમાં જાપાની જોડી માયુ માત્સુ મોટો અને વકાના નાગાહારાની ટક્કર થશે.