વિરાટ કોહલીએ પર્થ ટેસ્ટમાં ફટકારી સદી, કોહલીની કારકિર્દીની આ 30મી ટેસ્ટ સદી

ભારતીય બેટ્સમેન વિરાટ કોહલીએ ઓસ્ટ્રેલિયા સામે પર્થમાં રમાઈ રહેલી બોર્ડર-ગાવસ્કર ટ્રોફીની પ્રથમ મેચમાં સદી ફટકારી છે. પ્રથમ દાવમાં 5 રન બનાવીને આઉટ થયેલા કોહલીએ બીજી ઈનિંગમાં શાનદાર પ્રદર્શન કર્યું હતું. વિરાટ કોહલીએ પોતાની ટેસ્ટ કારકિર્દીની 30મી સદી ફટકારી હતી.

ઓસ્ટ્રેલિયામાં સૌથી વધુ ટેસ્ટ સદી ફટકારનાર ભારતીય બેટ્સમેન બની ગયો છે કોહલી. ઓસ્ટ્રેલિયામાં કોહલીની આ 7મી ટેસ્ટ સદી છે, જ્યારે સચિને તેની કારકિર્દીમાં ઓસ્ટ્રેલિયામાં છ સદી ફટકારી હતી. એટલું જ નહીં, છ વર્ષ બાદ ટેસ્ટ ફોર્મેટમાં કોહલીની આ પ્રથમ સદી છે. તેણે છેલ્લે 2018માં આ ફોર્મેટમાં સદી ફટકારી હતી. બોર્ડર ગાવસ્કર ટ્રોફીમાં સચિને અત્યારસુધી સૌથી વધારે સદી ફટકારી છે. તેના નામે 9 સદી છે. વિરાટ કોહલીના નામે પણ 9 સદી છે. જો વિરાટ કોહલી આ સીરિઝમાં હજુ એક સદી ફટકારી દે છે તો તે માસ્ટર બ્લાસ્ટરનો મહારેકોર્ડ તોડી શકે છે. કોહલી પહેલા યશસ્વી જયસ્વાલે પણ ભારત માટે આ મેચમાં સદી ફટકારી હતી.

ભૂતપૂર્વ ભારતીય કેપ્ટને હવે બોર્ડર-ગાવસ્કર ટ્રોફીમાં પોતાના 2000 રન પૂરા કર્યા છે. કોહલીએ પોતાની 44મી ઈનિંગમાં આ સિદ્ધિ મેળવી છે અને આવું કરનાર તે 5મો ભારતીય બેટ્સમેન બની ગયો છે. તેની પહેલા સચિન તેંડુલકર, રાહુલ દ્રવિડ, વીવીએસ લક્ષ્મણ અને ચેતેશ્વર પૂજારાએ આ કારનામું કર્યું હતું. સચિનના નામે હજુ પણ 3262 રનનો રેકોર્ડ છે.

કોહલીની આ આંતરરાષ્ટ્રીય ક્રિકેટ કારકિર્દીની 81મી સદી હતી. સૌથી વધુ આંતરરાષ્ટ્રીય સદીના મામલે કોહલી બીજા સ્થાને છે. સચિન તેંડુલકરની 100 સદી સાથે ટોપ પર છે.