વિરાટ કોહલીએ T20 ક્રિકેટમાંથી નિવૃત્તિની જાહેરાત કરી

T20 વર્લ્ડ કપ 2024ની ફાઈનલ મેચમાં પ્લેયર ઓફ ધ મેચ બન્યા બાદ વિરાટ કોહલીએ T20 ક્રિકેટમાંથી નિવૃત્તિ લેવાની જાહેરાત કરી છે. વિરાટ કોહલીએ T20 વર્લ્ડ કપ 2024ની ફાઇનલમાં 76 રનની ઈનિંગ માટે પ્લેયર ઓફ ધ મેચનો ખિતાબ જીત્યો હતો. મેચ બાદ કોહલીએ કહ્યું, "આ મારો છેલ્લો T20 વર્લ્ડ કપ હતો અને અમે આ જ હાંસલ કરવા માગતા હતા. એક દિવસ તમને લાગે છે કે તમે રન બનાવી શકતા નથી, તો ઘણી વસ્તુઓ થાય છે. ભગવાન મહાન છે, અને તે દિવસે ટીમ માટે મહત્વનો દિવસ હતો, તે દિવસે મેં ટીમ માટે કામ પૂરું કર્યું હતું."

કોહલીએ આગળ કહ્યું, "આ હવે છે કે ક્યારેય નહીં, ભારત માટે આ મારી છેલ્લી T20 મેચ હતી. હું તેનો મહત્તમ ઉપયોગ કરવા માંગતો હતો અને સફળ રહ્યો. કપ ઉપાડવા માંગતો હતો, દબાણ કરવાને બદલે પરિસ્થિતિનું સન્માન કરવા માંગતો હતો. હવે આવનારી પેઢીનો હવાલો લેવાનો સમય આવી ગયો છે, કેટલાક અદ્ભુત ખેલાડીઓ ટીમને આગળ લઈ જશે અને ધ્વજને ઊંચો રાખશે."

તમને જણાવી દઈએ કે વેસ્ટ ઈન્ડિઝના બાર્બાડોસમાં રમાયેલ 2024 ICC મેન્સ T20 વર્લ્ડ કપની ફાઇનલમાં ભારતે દક્ષિણ આફ્રિકાને 7 રને હરાવીને વર્લ્ડ કપનો ખિતાબ પોતાના નામે કર્યો છે. કોહલીને મેન ઓફ ધ મેચ પસંદ કરવામાં આવ્યો હતો, જ્યારે મેન ઓફ ધ સિરીઝનો ખિતાબ ઝડપી બોલર જસપ્રિત બુમરાહને મળ્યો હતો. ભારતીય ટીમ એવી પણ પહેલી ટીમ બની ગઈ છે જેણે વર્લ્ડ કપની એક પણ એડિશનમાં એક પણ મેચ હારી નથી. ટી20 વર્લ્ડ કપ 2024ની સમગ્ર ટુર્નામેન્ટમાં ટીમ ઈન્ડિયા અજેય રહી હતી.