CKSની છેલ્લી મેચમાં રમતો જોવા મળશે ધોની?, સુનિલ ગાવસ્કરે વધાર્યું સસ્પેન્સ

ભારતના પૂર્વ ક્રિકેટર સુનિલ ગાવસ્કરે સોમવારે સનરાઇઝર્સ હૈદરાબાદ (SRH) સામેની કરો કે મરો મેચમાં ચેન્નાઈ સુપર કિંગ્સ (CSK) તરફથી એમએસ ધોનીના પુનરાગમનની શક્યતાઓ પર ગંભીર શંકા વ્યક્ત કરી છે. ગાવસ્કરના મતે, આ દિગ્ગજ પૂર્વ કેપ્ટન એક વર્ષથી વધુ સમયથી સ્પર્ધાત્મક ક્રિકેટથી દૂર હોવાથી આ તબક્કે આવું કોઈ જોખમ લેવા ઈચ્છશે નહીં.

ભારતના પૂર્વ ક્રિકેટર સુનિલ ગાવસ્કરે સોમવારે સનરાઇઝર્સ હૈદરાબાદ (SRH) સામેની કરો કે મરો મેચમાં ચેન્નાઈ સુપર કિંગ્સ (CSK) તરફથી એમએસ ધોનીના પુનરાગમનની શક્યતાઓ પર ગંભીર શંકા વ્યક્ત કરી છે. ગાવસ્કરના મતે, આ દિગ્ગજ પૂર્વ કેપ્ટન એક વર્ષથી વધુ સમયથી સ્પર્ધાત્મક ક્રિકેટથી દૂર હોવાથી આ તબક્કે આવું કોઈ જોખમ લેવા ઈચ્છશે નહીં. ગાવસ્કરે જણાવ્યું હતું કે પ્લેઓફની રેસ માટે ચેપોક સ્ટેડિયમ ખાતે રમાનારી CSK અને SRH વચ્ચેની આ મેચ ખૂબ જ મહત્વપૂર્ણ છે. જોકે, ચાહકો સીઝનની છેલ્લી હોમ મેચમાં ધોનીને રમતા જોવાની આશા રાખી રહ્યા હોવા છતાં, તે પ્લેઇંગ ઇલેવનમાં સામેલ થાય તેવી શક્યતા ઓછી છે.

ગાવસ્કરે જણાવ્યું કે, "SRH સામેની મેચ CSK માટે અત્યંત મહત્વની છે. ચેપોકમાં આ તેમની છેલ્લી હોમ મેચ છે, તેથી સ્વાભાવિક રીતે જ ચાહકો એમએસ ધોનીને રમતા જોવા માંગે છે. પરંતુ તે આખી સીઝનમાં એક પણ મેચ રમ્યા નથી. વાસ્તવમાં, તેમણે એક વર્ષથી વધુ સમયથી પ્રોફેશનલ ક્રિકેટ નથી રમ્યું. તેથી, મને શંકા છે કે તેઓ આ તબક્કે આવું મોટું જોખમ લેશે." પૂર્વ ભારતીય કેપ્ટને ભારપૂર્વક જણાવ્યું હતું કે ટૂર્નામેન્ટના આવા કપરા તબક્કે CSKને એવા ખેલાડીઓની જરૂર છે જેઓ પહેલેથી જ લયમાં હોય અને મેચ માટે સંપૂર્ણ તૈયાર હોય. તેમણે ઉમેર્યું કે, "તમારે એવા ખેલાડીઓની જરૂર છે જેઓ છેલ્લા છ અઠવાડિયાથી મેચ-ફિટ હોય અને નિયમિત રમી રહ્યા હોય. ધોની સંપૂર્ણપણે ટીમ-મેન છે. મને નથી લાગતું કે તેઓ વર્તમાન ટીમના સમીકરણોને બગાડવા માંગે. જો તેઓ SRH સામે રમશે તો મને ભારે આશ્ચર્ય થશે. CSK માટે આ મેચ જીતવી અનિવાર્ય છે. જીત તેમને પ્લેઓફની રેસમાં જીવંત રાખશે. તેમણે આ મેચ ગમે તે ભોગે જીતવી જ પડશે, અને એક વર્ષથી ન રમેલા ખેલાડીને ટીમમાં લાવવો એ એક મોટો જુગાર સાબિત થઈ શકે છે."

રિયાન પરાગના નિર્ણય પર ગાવસ્કરના આકરા પ્રહારો
બીજી તરફ, રવિવારે રમાયેલી મેચમાં વિકેટકીપર-બેટ્સમેન કેએલ રાહુલની ૪૨ બોલમાં ૫૬ રનની સંયમી ઇનિંગની મદદથી દિલ્હી કેપિટલ્સે રાજસ્થાન રોયલ્સ (RR) સામે પાંચ વિકેટે રોમાંચક જીત મેળવી હતી. આ મેચમાં રાજસ્થાન રોયલ્સના કેપ્ટન રિયાન પરાગ દ્વારા મેચની મહત્વની ઓવર ડોનોવન ફરેરાને આપવાના નિર્ણયની ગાવસ્કરે આકરી ટીકા કરી હતી અને આ પગલાને "આત્મઘાતી" ગણાવ્યું હતું. ગાવસ્કરે કહ્યું, "૧૮મી ઓવર ફેંકવા માટે ડોનોવન ફરેરાને બોલ સોંપવો એ એક આત્મઘાતી નિર્ણય હતો. તમે એવા પિચ પર સ્લો બોલરને લાવી રહ્યા છો જ્યાં તેને કોઈ મદદ નહોતી મળી રહી. તે માત્ર સ્લોટમાં બોલિંગ કરી રહ્યો હતો. આ મેચમાં તેની પહેલી જ ઓવર હતી. આ સિવાય તે બેટિંગમાં પણ ગોલ્ડન ડક (પહેલા જ બોલે આઉટ) થયો હતો." તેમણે આ નિર્ણયના સમય પર સવાલ ઉઠાવતા કહ્યું કે કટોકટીની ક્ષણે રાજસ્થાન રોયલ્સે અન્ય સુરક્ષિત બોલિંગ વિકલ્પોની અવગણના કરી. તેમણે ઉમેર્યું, "કેટલીકવાર તમારે એ પણ જોવું પડે છે કે તે દિવસે તમારું નસીબ કઈ તરફ જઈ રહ્યું છે. જો તેણે બેટિંગમાં ૪૦ કે ૫૦ રન બનાવ્યા હોત અને તેનો આત્મવિશ્વાસ વધારે હોત, તો તેને ઓવર આપવી યોગ્ય ગણાત. પરંતુ તે પહેલા જ બોલે આઉટ થઈ ગયો હતો, અને છતાં તમે તેને બોલ આપ્યો. તેની તે ઓવરમાં ૧૬ રન આવ્યા અને મેચ ત્યાં જ હાથમાંથી નીકળી ગઈ." "રિયાન પરાગ કોઈ યોગ્ય કે નિયમિત બોલરને બોલ આપી શક્યા હોત. ભલે તે બોલર ૨૦ રન આપી દેત, પરંતુ મુદ્દો એ નથી. મુદ્દો એ છે કે આવા નિર્ણાયક તબક્કે ડોનોવન ફરેરાને બોલ આપવો એ રાજસ્થાન રોયલ્સનો ઘાતક નિર્ણય હતો."

મિશેલ સ્ટાર્કની શાનદાર બોલિંગના વખાણ
દિલ્હી કેપિટલ્સની આ જીત ડેથ ઓવર્સમાં મિશેલ સ્ટાર્કની શાનદાર ચાર વિકેટની મદદથી શક્ય બની હતી, જેણે રાજસ્થાનને ૧૯૩/૮ રન પર રોકી દીધું હતું. ગાવસ્કરે શરૂઆતમાં મોંઘા સાબિત થયા બાદ પણ ડેથ ઓવરોમાં શાનદાર વાપસી કરવા બદલ મિશેલ સ્ટાર્કની પ્રશંસા કરી હતી. ગાવસ્કરે કહ્યું, "વાત માત્ર એ નથી કે તમે કેટલી વિકેટો લો છો, પરંતુ એ છે કે તમે કયા સમયે વિકેટ લો છો. યોગ્ય સમયે લેવાયેલી વિકેટ મેચનો પાસો પલટી નાખે છે. મિશેલ સ્ટાર્કની પાવરપ્લે ઓવરો સારી રહી ન હતી. પરંતુ જ્યારે તે ડેથ ઓવર્સમાં પાછો આવ્યો ત્યારે તેણે શાનદાર નિયંત્રણ સાથે બોલિંગ કરી. તેણે રાજસ્થાનના બેટ્સમેનોને હાથ ખોલવાની તક ન આપી. તેણે રનની ગતિ રોકી અને મહત્વની વિકેટો ઝડપી. તે વિકેટોએ મેચ દિલ્હી તરફ વાળી દીધી. રાજસ્થાન આરામથી ૨૦૦ રન વટાવી જાય તેવું લાગતું હતું, પરંતુ સ્ટાર્કના ઈરાદા અલગ હતા. રાજસ્થાનને તેને હળવાશથી લેવાની કિંમત ચૂકવવી પડી."

પ્લેઓફની રેસ પર ગાવસ્કરનું ગણિત
પ્લેઓફની રેસ અંગે ગાવસ્કરે જણાવ્યું કે, રોયલ ચેલેન્જર્સ બેંગલુરુ સામે હારવા છતાં પંજાબ કિંગ્સ હજી પણ રેસમાં મજબૂત રીતે ટકેલું છે. ગાવસ્કરે કટાક્ષ કરતા કહ્યું, "જો પંજાબ કિંગ્સ પ્લેઓફમાં ક્વોલિફાય કરી લે તો મને નવાઈ નહીં લાગે, કારણ કે રાજસ્થાન રોયલ્સ જેવી ટીમો ક્વોલિફાય ન થવા માટે પોતાનાથી બનતા તમામ પ્રયાસો કરી રહી છે. તેઓ જીતી શકાય તેવી મેચ દિલ્હી સામે હારી ગયા. જો રાજસ્થાન આવી જ રીતે જીતેલી મેચો હારતું રહેશે, તો પંજાબને માત્ર તેમની આગામી મેચ જીતવાની જરૂર રહેશે. તેનાથી તેઓ ૧૫ પોઈન્ટ પર પહોંચી જશે, જે કદાચ પૂરતા હોઈ શકે છે. હા, સનરાઇઝર્સ પંજાબ કરતા આગળ છે અને CSK હજી પણ ૧૪ કે ૧૬ પોઈન્ટ સુધી પહોંચી શકે છે. પરંતુ જો CSK એક પણ મેચ હારે છે, તો પંજાબ પાસે ક્વોલિફાય થવાની વાસ્તવિક તક રહેશે."