RCBના સન્માન સમારોહમાં ચિન્નાસ્વામી સ્ટેડિયમ બહાર નાસભાગ

બેંગલુરુમાં ચિન્નાસ્વામી સ્ટેડિયમ નજીક RCBના IPL વિજય ઉજવણી દરમિયાન ભાગદોડમાં 13 લોકોના મૃત્યુની આશંકા

રોયલ ચેલેન્જર્સ બેંગલુરુ (RCB)ના પ્રથમ IPL વિજયની ઉજવણી દુ:ખદ બની ગઈ જ્યારે અહીં ચિન્નાસ્વામી સ્ટેડિયમ નજીક ભાગદોડ મચી ગઈ, જેમાં 33 થી વધુ લોકો ઘાયલ થયા હોવાની આશંકા અને 13 લોકોના મૃત્યુ થયાની આશંકા છે વ્યક્ત કરાઈ છે. આ ઘટના ત્યારે બની જ્યારે ચાહકો RCB ટીમ દ્વારા જીતની ઉજવણીમાં જોડાઈ રહ્યા હતા. અધિકારીઓએ પુષ્ટિ આપી છે કે 2 લોકોના મૃતદેહ બોરિંગ હોસ્પિટલમાં અને 4 અન્ય વૈદેહી હોસ્પિટલમાં છે. 6 લોકોની સારવાર વૈદેહી હોસ્પિટલના ICUમાં ચાલી રહી છે અને ત્રણને ICUમાં દાખલ કરવામાં આવ્યા છે. સૂત્રોએ અન્ય બે લોકોના મૃત્યુની પુષ્ટિ કરી છે. મૃતકોની ઓળખ હજુ સુધી થઈ નથી.

મુખ્યમંત્રી સિદ્ધારમૈયા અને નાયબ મુખ્યમંત્રી ડી.કે. શિવકુમારે બોરિંગ હોસ્પિટલની મુલાકાત લીધી. હજારો ચાહકો ઉતાવળમાં વિવિધ દરવાજાઓ દ્વારા સ્ટેડિયમમાં પ્રવેશવાનો પ્રયાસ કરી રહ્યા હતા ત્યારે નાસભાગ મચી ગઈ. ઘટનાસ્થળે હાજર પોલીસે ઘાયલોને એમ્બ્યુલન્સમાં ભર્યા અને તેમને નજીકની બોરિંગ હોસ્પિટલમાં લઈ ગયા. પોલીસે જણાવ્યું કે રસ્તાઓ પર ભીડ હોવાથી એમ્બ્યુલન્સ ઝડપથી હોસ્પિટલ પહોંચી શકી ન હતી. કર્ણાટક સરકારે અગાઉ સુરક્ષા કારણોસર વિધાન સૌધાથી ચિન્નાસ્વામી ક્રિકેટ સ્ટેડિયમ સુધીની વિજય પરેડ રદ કરી હતી. પોલીસે જણાવ્યું હતું કે તેઓ મંગળવાર રાતથી ઉજવણી કરી રહેલી ભીડને નિયંત્રિત કરી રહ્યા છે. આખી રાત, સુરક્ષા દળો તેમને નિયંત્રિત કરવામાં અને કોઈ અનિચ્છનીય ઘટના ન બને તેની ખાતરી કરવામાં રોકાયેલા હતા.