ભારતીય શેરબજારમાં તેજી, સેન્સેક્સ 740 પોઈન્ટ વધ્યો, રોકાણકારોએ 9 લાખ કરોડ રૂપિયાનો નફો કર્યો

બુધવારના ટ્રેડિંગ સત્રમાં ભારતીય શેરબજારમાં જોરદાર ઉછાળો જોવા મળ્યો. નિફ્ટીએ સતત 10 દિવસના ઘટાડાના વલણને તોડ્યું અને એક ટકાથી વધુના વધારા સાથે બંધ થયો.

ટ્રેડિંગના અંતે સેન્સેક્સ 740 પોઈન્ટ અથવા 1.01 ટકા વધીને 73,730 પર અને નિફ્ટી 254 પોઈન્ટ અથવા 1.15 ટકા વધીને 22,337 પર બંધ રહ્યો હતો.

બજારમાં થયેલા વધારાને કારણે બોમ્બે સ્ટોક એક્સચેન્જ (BSE)માં લિસ્ટેડ તમામ કંપનીઓનું માર્કેટ કેપ 9 લાખ કરોડ રૂપિયા વધીને 393 લાખ કરોડ રૂપિયા થયું છે, જે મંગળવારે 384 લાખ કરોડ રૂપિયા હતું.

લાર્જકેપ્સની સાથે, મિડકેપ્સ અને સ્મોલકેપ્સમાં પણ ખરીદી જોવા મળી છે. નિફ્ટી મિડકેપ 100 ઇન્ડેક્સ 1,160 પોઈન્ટ અથવા 2.42 ટકા વધીને 49,168 પર બંધ થયો હતો, અને નિફ્ટી સ્મોલકેપ 100 ઇન્ડેક્સ 436.50 પોઈન્ટ અથવા 2.96 ટકા વધીને 15,199 પર બંધ થયો હતો.

બજારમાં લગભગ બધા જ ક્ષેત્રીય સૂચકાંકો લીલા નિશાનમાં બંધ થયા. ઓટો, આઇટી, પીએસયુ બેંક, ફાઇનાન્શિયલ સર્વિસિસ, મેટલ, રિયલ્ટી, એનર્જી, ઇન્ફ્રા અને પીએસઇ ટોચના વધ્યા હતા.

બજારનો વ્યાપક સેન્ટિમેન્ટ પણ સકારાત્મક રહ્યો. BSC પર 3,241 શેર લીલા નિશાનમાં 771 શેર લાલ નિશાનમાં અને 89 શેર કોઈ ફેરફાર વગર બંધ થયા હતા.

સેન્સેક્સમાં અદાણી પોર્ટ્સ, ટાટા સ્ટીલ, એમ એન્ડ એમ, પાવર ગ્રીડ, એનટીપીસી, ટેક મહિન્દ્રા, ટાટા મોટર્સ, આઇટીસી, ભારતી એરટેલ, એચસીએલ ટેક, નેસ્લે, એસબીઆઈ, કોટક મહિન્દ્રા બેંક, એક્સિસ બેંક અને ઇન્ફોસિસ સૌથી વધુ વધ્યા હતા. બજાજ ફાઇનાન્સ, ઇન્ડસઇન્ડ બેંક, એચડીએફસી બેંક, ઝોમેટો અને મારુતિ સુઝુકીના શેર સૌથી વધુ ઘટ્યા હતા.

આ તરફ વિદેશી સંસ્થાકીય રોકાણકારો એટલે કે FIIએ 4 માર્ચે પણ વેચાણનો દોર ચાલુ રાખ્યો અને 3,405.82 કરોડ રૂપિયાના શેર વેચ્યા. જોકે, સ્થાનિક સંસ્થાકીય રોકાણકારો એટલે કે DIIએ પણ તેમની ખરીદી ચાલુ રાખી અને તે જ દિવસે રૂ. 4,851.43 કરોડના શેર ખરીદ્યા.