પુષ્પ કમલ દહલ નેપાળના પ્રધાનમંત્રી પદના શપથ લીધા, ભારત-નેપાળ સંબંધો પર આનાથી કેવી થશે અસર

તત્કાલીન પીએમ દેઉબાની ભારત મુલાકાત દરમિયાન બંને દેશોએ દ્વિપક્ષીય સંબંધોને મજબૂત કરવા માટે ઘણા કરારો પર હસ્તાક્ષર કર્યા

નજીકના પાડોશી તરીકે, ભારત અને નેપાળ મિત્રતા અને સહયોગના અનોખા સંબંધો ધરાવે છે. ઉચ્ચ સ્તરીય મુલાકાતો અને ક્રિયાપ્રતિક્રિયાઓના નિયમિત આદાનપ્રદાન સાથે, બંને દેશોએ તેમના વ્યૂહાત્મક સંબંધોને વધુ ઉન્નત બનાવ્યા છે. નોંધનીય છે કે, તાજેતરમાં યોજાયેલી બે ઉચ્ચ સ્તરીય મુલાકાતો (PM મોદીની લુમ્બિની મુલાકાત અને નેપાળના તત્કાલીન પીએમ શેર બહાદુર દેઉબાની નવી દિલ્હી મુલાકાત) સાથે બંને વચ્ચેના સંબંધો ઉપરની દિશામાં આગળ વધતા જોઈ શકાય છે.

ભારત અને નેપાળના સંબંધો હિમાલયની જેમ અડીખમ છે અને સતત મજબુત બનતી મિત્રતા ઉભરતી વૈશ્વિક પરિસ્થિતિમાં સમગ્ર માનવતાને લાભ કરશે, એમ પીએમ મોદીએ ભારપૂર્વક જણાવ્યું હતું.

તત્કાલીન પીએમ દેઉબાની ભારત મુલાકાત દરમિયાન બંને દેશોએ દ્વિપક્ષીય સંબંધોને મજબૂત કરવા માટે ઘણા કરારો પર હસ્તાક્ષર કર્યા હતા. ભારત અને નેપાળ સંરક્ષણ, જળ સંસાધનો, ઉર્જા ક્ષેત્ર અને સંસ્કૃતિ સહિતના વિવિધ ક્ષેત્રોમાં વ્યાપક સહયોગ વહેંચે છે. ભારત નેપાળનો સૌથી મોટો વેપારી ભાગીદાર હોવાને કારણે આર્થિક સહકાર એ બંને દેશો વચ્ચે વહેંચાયેલ અગ્રણી કેન્દ્રબિંદુઓમાંનું એક છે.

ઉપરાંત, વર્ષોથી નેપાળમાં કનેક્ટિવિટી અને વિકાસ ભાગીદારીમાં ભારતનું યોગદાન તેની વિદેશ નીતિના મુખ્ય પાસાઓ પૈકીનું એક છે. નેપાળ માટે ભારતની વિકાસ સહાય પાયાના સ્તરે ઈન્ફ્રાસ્ટ્રક્ચરના નિર્માણ પર કેન્દ્રિત છે. આ અંતર્ગત, માળખાકીય સુવિધાઓ, આરોગ્ય, જળ સંસાધનો, શિક્ષણ અને ગ્રામીણ અને સામુદાયિક વિકાસના ક્ષેત્રોમાં વિવિધ પ્રોજેક્ટ અમલમાં મૂકવામાં આવ્યા છે.

કાઠમંડુમાં તાજેતરના રાજકીય વિકાસથી ભારત-નેપાળ સંબંધોમાં નવી ગતિ ફરી શકે છે. સીપીએન-માઓઇસ્ટ સેન્ટરના અધ્યક્ષ પુષ્પ કમલ દહલે અગાઉ મજબૂત ભારત-નેપાળ સંબંધોની પુનઃ પુષ્ટિ કરી હતી. તેમણે કહ્યું કે, નેપાળ તેના વિકાસના કાર્યોમાં ભારતના લાંબા સમયથી ચાલતા સહયોગને ખૂબ મહત્વ આપે છે.