અરવિંદ કેજરીવાલની ન્યાયિક હિરાસત 20 ઓગસ્ટ સુધી લંબાવવાઈ

દિલ્હીના મુખ્યમંત્રી અરવિંદ કેજરીવાલની ન્યાયિક કસ્ટડી 20 ઓગસ્ટ સુધી લંબાવવામાં આવી છે. કેજરીવાલની કસ્ટડીનો સમયગાળો પૂરો થયા બાદ તેને તિહાર જેલમાંથી વીડિયો કોન્ફરન્સિંગ દ્વારા ગુરુવારે રાઉઝ એવન્યુ કોર્ટમાં રજૂ કરવામાં આવ્યો હતો.

આ પહેલા સોમવારે દિલ્હી હાઈકોર્ટે ભ્રષ્ટાચારના કેસમાં સીબીઆઈ દ્વારા તેમની ધરપકડને પડકારતી અરજીને ફગાવી દીધી હતી. જસ્ટિસ નીના બંસલ કૃષ્ણની બેન્ચે કેજરીવાલને મુક્તિ માટે નીચલી કોર્ટનો સંપર્ક કરવા જણાવ્યું હતું.  જોકે, દિલ્હી હાઈકોર્ટે હજુ સુધી ભ્રષ્ટાચારના કેસમાં તેમની જામીન અરજી પર ચુકાદો આપ્યો નથી.  સીબીઆઈએ સીએમ કેજરીવાલ અને અન્ય આરોપીઓ વિરુદ્ધ સ્પેશિયલ કોર્ટમાં ચાર્જશીટ દાખલ કરી છે. 

ઇડીએ મની લોન્ડરિંગ કેસમાં ચાર્જશીટ દાખલ કરી દીધી છે, જેમાં AAP અને તેના રાષ્ટ્રીય કન્વીનર અરવિંદ કેજરીવાલને આરોપી તરીકે નામ આપવામાં આવ્યા છે. 12 જુલાઈના રોજ, સુપ્રીમ કોર્ટે એન્ફોર્સમેન્ટ ડિરેક્ટોરેટ (ED) દ્વારા નોંધાયેલા મની લોન્ડરિંગ કેસમાં કેજરીવાલને વચગાળાના જામીન પર મુક્ત કરવાનો આદેશ આપ્યો હતો, પરંતુ સીબીઆઈ દ્વારા તેમની ધરપકડ કરવામાં આવી હોવાથી તેઓ જેલમાંથી બહાર આવી શક્યા ન હતા.

સીએમ કેજરીવાલ હાલમાં દારૂ કૌભાંડ સંબંધિત ભ્રષ્ટાચાર અને મની લોન્ડરિંગ કેસમાં તિહાર જેલમાં બંધ છે. બુધવારે તેઓ દિલ્હીના એલજી વી.કે. સક્સેનાને પત્ર લખીને જાણ કરી હતી કે આ સ્વતંત્રતા દિવસ પર તેમના સ્થાને શિક્ષણ મંત્રી આતિશી ધ્વજ ફરકાવશે. પરંપરાગત રીતે, છત્રસાલ સ્ટેડિયમમાં દિલ્હી સરકારના કાર્યક્રમોમાં મુખ્યમંત્રી ત્રિરંગો ફરકાવે છે. પરંતુ કેજરીવાલ આ વખતે જેલમાં છે. તેથી, તેણે આતિશીને તેની જગ્યાએ ધ્વજ ફરકાવવા માટે અધિકૃત કર્યો છે.