કેન્દ્રિય નાણામંત્રી નિર્મલા સીતારમણ GST પરિષદની 46મી બેઠકની કરશે અધ્યક્ષતા

આજે દિલ્હીમાં GST કાઉન્સિલની 46મી બેઠક યોજાશે જેની અધ્યક્ષતા કેન્દ્રીય નાણાંમંત્રી નિર્મલા સિતારમણ કરશે. કાપડ વેપારીઓનાં GST વધારાના વિરોધ વચ્ચે GST કાઉન્સિલની બેઠક મળશે ત્યારે આ બેઠકમાં ટેક્સટાઈલ ઉદ્યોગ પર 5 ટકા GSTના બદલે 12 ટકા લાદવામાં આવેલા GST ને ઘટાડવા પર ચર્ચા થઈ શકે છે. બેઠકમાં રાજ્યોનાં નાણામંત્રી અને નાણાં મંત્રાલયના સચિવો હાજર રહેશે. આ સિવાય બેઠકમાં મુખ્ય મુદ્દો નાણામંત્રીઓ દ્વારા રજૂ કરવામાં આવેલ દરમાં ફેરફાર અંગેનો રાજ્ય સ્તરીય સમિતિનો અહેવાલ રહેશે. દરમાં ફેરફાર કરવા માટે રચાયેલી સમિતિ તેનો અહેવાલ કાઉન્સિલને સુપરત કરશે. આ રૂબરૂ મળનારી બેઠકમાં કેટલીક વસ્તુઓમાં ડ્યુટી વ્યુત્ક્રમના સુધારા અંગે પણ ચર્ચા કરવામાં આવશે.