સાબરમતી રિવરફ્રન્ટ ખાતે ‘સન્ડેઝ ઓન સાયકલોથોન’ની ધૂમ

સાબરમતી રિવરફ્રન્ટ ખાતે ‘સન્ડેઝ ઓન સાયકલોથોન’ની ધૂમ

વિશ્વ સાયકલ દિવસની સ્મૃતિમાં અમદાવાદના સાબરમતી રિવરફ્રન્ટ ખાતે ‘સન્ડેઝ ઓન સાયકલોથોન’નું ભવ્ય આયોજન કરવામાં આવ્યું હતું. વહેલી સવારથી જ રિવરફ્રન્ટનો નજારો ઉત્સાહ અને ફિટનેસના રંગે રંગાયેલો જોવા મળ્યો હતો. આ વિશેષ સાયકલોથોનને અમદાવાદના મેયર હિતેશ બારોટ દ્વારા લીલી ઝંડી આપીને પ્રસ્થાન કરાવવામાં આવ્યું હતું.

વહેલી સવારથી જ નાગરિકોનો ભારે ઉત્સાહ

આરોગ્ય અને ફિટનેસ પ્રત્યે જાગૃતિ ફેલાવવાના ઉદ્દેશ્ય સાથે યોજાયેલી આ સાયકલોથોનમાં અમદાવાદીઓએ ઉત્સાહભેર ભાગ લીધો હતો. વહેલી સવારથી જ શહેરના ઉત્સાહી યુવાનો, વિવિધ સામાજિક અને સ્પોર્ટ્સ સંસ્થાઓના હોદ્દેદારો તેમજ સામાન્ય નાગરિકો રિવરફ્રન્ટ ખાતે એકત્રિત થયા હતા. સાયકલિંગ સિવાય કાર્યક્રમમાં ભાગ લેવા આવેલા લોકો માટે વિશેષ જુમ્બા ડાન્સ (Zumba Dance) નું પણ આયોજન કરાયું હતું, જેની નાગરિકોએ મન મૂકીને મજા માણી હતી.

વર્લ્ડ બાયસિકલ ડેની અનોખી ઉજવણી

પર્યાવરણની જાળવણી અને શારીરિક સ્વાસ્થ્ય બંને માટે સાયકલ ચલાવવી અત્યંત ફાયદાકારક છે તેવો સંદેશ આપવા માટે આ સાયકલોથોનનું આયોજન કરવામાં આવ્યું હતું. રિવરફ્રન્ટના ટ્રેક પર હજારો પેડલ એકસાથે ફરતા જોઈને સમગ્ર વાતાવરણ ઉર્જાથી ભરાઈ ગયું હતું.

આ પ્રસંગે ઉપસ્થિત રહેલા મેયર હિતેશ બારોટે નાગરિકોના આ અદભુત ઉત્સાહને બિરદાવ્યો હતો અને ફિટનેસને પોતાની રોજિંદી જીવનશૈલીનો ભાગ બનાવવા માટે અપીલ કરી હતી.