ચાર દિવસના ઘટાડા બાદ શેરબજાર લીલા નિશાનમાં બંધ

વૈશ્વિક બજારના મિશ્ર સંકેતો વચ્ચે ભારતીય શેરબજારમાં સતત ચાર દિવસથી ચાલી રહેલા ઘટાડાનો અંત આવ્યો છે અને સેન્સેક્સ-નિફ્ટી નજીવા વધારા સાથે લીલા નિશાનમાં બંધ થયા છે. બજારમાં મેટલ અને કન્ઝ્યુમર ડ્યુરેબલ સેક્ટરમાં તેજી જોવા મળી હતી, જ્યારે આઈટી અને ઓટો શેરોમાં ઘટાડો નોંધાયો હતો. આ સાધારણ સુધારાને કારણે લિસ્ટેડ કંપનીઓની માર્કેટ કેપમાં વધારો થતા રોકાણકારોની સંપત્તિમાં એક જ દિવસમાં 2 લાખ કરોડ રૂપિયાથી વધુનો વધારો થયો છે.

વૈશ્વિક બજારના મિશ્ર સંકેતો વચ્ચે સપ્તાહના ત્રીજા ટ્રેડિંગ દિવસે બુધવારે ભારતીય શેરબજાર નજીવા વધારા સાથે લીલા નિશાનમાં બંધ રહ્યું હતું, જેના કારણે સતત ચાર દિવસથી ચાલી રહેલી ઘટાડાની શ્રેણી અટકી ગઈ છે.

આ દરમિયાન, સેન્સેક્સ 49.74 પોઈન્ટ અથવા 0.07 ટકા વધીને 74,608.98 પર બંધ થયો હતો, જ્યારે નિફ્ટી 50 33.05 પોઈન્ટ અથવા 0.14 ટકા વધીને 23,412.60 પર બંધ થયો હતો.

દિવસ દરમિયાન 30 શેરો ધરાવતો BSE સેન્સેક્સ 74,439.34 પર ખુલ્યો હતો અને 75,191.57 ની ઇન્ટ્રા-ડે હાઈ તથા 74,134.48 ની લો સપાટી બનાવી હતી. જ્યારે 50 શેરો ધરાવતો નિફ્ટી 50 23,362.45 પર ખુલ્યા બાદ 23,582.95 ની ડે-હાઈ અને 23,262.55 ની લો સપાટીએ પહોંચ્યો હતો.

બ્રોડ માર્કેટમાં મુખ્ય બેન્ચમાર્ક કરતા વધુ સારો દેખાવ જોવા મળ્યો હતો, જેમાં નિફ્ટી મિડકેપ ઇન્ડેક્સમાં 0.77 ટકા અને નિફ્ટી સ્મોલકેપ ઇન્ડેક્સમાં 0.31 ટકાનો ઉછાળો જોવા મળ્યો હતો.

સેક્ટર મુજબ જોઈએ તો, સૌથી વધુ નિફ્ટી આઈટીમાં 1.13 ટકા અને નિફ્ટી ઓટોમાં 0.97 ટકાનો ઘટાડો નોંધાયો હતો. આ ઉપરાંત નિફ્ટી બેંક, નિફ્ટી રિયલ્ટી અને નિફ્ટી મીડિયામાં પણ ઘટાડો જોવા મળ્યો હતો. બીજી તરફ, નિફ્ટી મેટલમાં સૌથી વધુ 3.18 ટકાનો ઉછાળો નોંધાયો હતો. તેની સાથે નિફ્ટી કન્ઝ્યુમર ડ્યુરેબલમાં 1.67 ટકા અને નિફ્ટી ઓઈલ એન્ડ ગેસમાં 1.28 ટકાની તેજી જોવા મળી હતી. આ ઉપરાંત નિફ્ટી હેલ્થકેર, નિફ્ટી FMCG અને નિફ્ટી ફાર્મામાં પણ વધારો નોંધાયો હતો.

નિફ્ટી 50 માં એશિયન પેઇન્ટ્સ, અદાણી એન્ટરપ્રાઇઝિસ, ટાટા સ્ટીલ, હિંડાલ્કો, BEL, અદાણી પોર્ટ્સ અને સિપ્લાના શેરો સૌથી વધુ તેજી સાથે 'ટોપ ગેનર્સ'ની યાદીમાં રહ્યા હતા. જ્યારે આઈશર મોટર્સ, M&M, ઇન્ફોસિસ, ટેક મહિન્દ્રા, સન ફાર્મા, પાવરગ્રીડ અને TCS ના શેરમાં સૌથી વધુ ઘટાડો જોવા મળ્યો હતો.

આ સમયગાળા દરમિયાન, BSE પર લિસ્ટેડ કંપનીઓનું કુલ માર્કેટ કેપ અગાઉના સત્રના 456.3 લાખ કરોડ રૂપિયાથી વધીને આશરે 458.6 લાખ કરોડ રૂપિયા થઈ ગયું છે, જેનાથી રોકાણકારોને એક જ સત્રમાં 2 લાખ કરોડ રૂપિયાથી વધુનો ફાયદો થયો છે.