શેરબજારમાં ઘટાડો, સેન્સેક્સ 113 અને નિફ્ટી 42 પોઈન્ટ તૂટ્યા

અમેરિકાના મજબૂત જોબ ડેટાને કારણે યુએસ ફેડરલ રિઝર્વ દ્વારા વ્યાજદરમાં વધારો થવાની શક્યતા વધી જતાં વૈશ્વિક બજારોની સાથે ભારતીય શેરબજારમાં પણ સપ્તાહના પ્રથમ દિવસે મંદીનો માહોલ જોવા મળ્યો છે. સોમવારે પ્રારંભિક કારોબારમાં સ્થાનિક સૂચકાંક ગ્રીન ઝોનમાંથી રેડ ઝોનમાં સરકી ગયા હતા.

બજારની શરૂઆત રેડ નિશાન સાથે
સવારે 9:18 વાગ્યે બીએસઈ (BSE) સેન્સેક્સ 113 પોઈન્ટ અથવા 0.16% ઘટીને 76,410ની સપાટીએ પહોંચ્યો હતો. જ્યારે એનએસઈ (NSE) નિફ્ટી 42 પોઈન્ટ અથવા 0.16%ની નબળાઈ સાથે 23,861 પર કારોબાર કરી રહ્યો હતો. મુખ્ય ઇન્ડેક્સ ઉપરાંત બ્રોડર માર્કેટમાં પણ વેચવાલી જોવા મળી હતી; નિફ્ટી મિડકેપ 100 ઇન્ડેક્સ 146 પોઈન્ટ ઘટીને 62,932 અને નિફ્ટી સ્મોલકેપ 100 ઇન્ડેક્સ 19 પોઈન્ટ ઘટીને 20,078 પર ટ્રેડ થઈ રહ્યો હતો.

આઈટી અને મીડિયા શેરોમાં સૌથી વધુ ધોવાણ
બજારમાં શરૂઆતી મંદીની આગેવાની આઈટી અને મીડિયા સેક્ટરે કરી હતી. આ સિવાય રિયાલ્ટી, મેટલ, ઓટો, કમોડિટીઝ, એફએમસીજી, ઓઇલ એન્ડ ગેસ, પ્રાઇવેટ બેન્ક અને કન્ઝ્યુમર ડ્યુરેબલ્સ ક્ષેત્રના શેરો પણ લાલ નિશાનમાં કારોબાર કરી રહ્યા હતા. સમગ્ર બજારમાં માત્ર નિફ્ટી ઇન્ડિયા ડિફેન્સ અને નિફ્ટી ફાર્મા ક્ષેત્રે જ લીલા નિશાનમાં ટ્રેડિંગ જાળવી રાખ્યું હતું.

ટોપ ગેઈનર્સ અને લૂઝર્સ
ટોપ ગેઈનર્સ: ઇટરનલ, બીઇએલ (BEL), ભારતી એરટેલ, બજાજ ફાઇનાન્સ, આઇસીઆઇસીઆઇ બેન્ક, એલએન્ડટી, ટ્રેન્ટ, સન ફાર્મા અને ટાઇટન.
ટોપ લુઝર: ઇન્ફોસિસ, ટેક મહિન્દ્રા, એચસીએલ ટેક, ટાટા સ્ટીલ, ઇન્ડિગો, એક્સિસ બેન્ક, કોટક મહિન્દ્રા બેન્ક, પાવર ગ્રીડ, એચયુએલ, એશિયન પેઇન્ટ્સ, અલ્ટ્રાટેક સિમેન્ટ, એનટીપીસી અને એચડીએફસી બેન્ક.

વૈશ્વિક બજારોનો મિશ્ર સંકેત
એશિયન બજારોમાં સવારે મિશ્ર વલણ જોવા મળ્યું હતું. ટોક્યો, બેંગકોક, તાઈપેઈ, સિઓલ અને જર્કાતાના બજારો ગ્રીન ઝોનમાં હતા, જ્યારે શાંઘાઈ અને હોંગકોંગના બજારો ઘટાડા સાથે કારોબાર કરી રહ્યા હતા. ઉલ્લેખનીય છે કે, શુક્રવારે યુએસ માર્કેટ બંધ થતી વખતે ડાઉ જોન્સ 0.51% અને ટેકનોલોજી ઇન્ડેક્સ નાસ્દાક 0.29%ના ઘટાડા સાથે બંધ થયા હતા.

ઘટાડા પાછળનું મુખ્ય કારણ
બજારના નિષ્ણાતોના જણાવ્યા અનુસાર, અમેરિકાના તાજેતરના જોબ ડેટા અપેક્ષા કરતાં આશરે ત્રણ ગણા વધુ મજબૂત આવ્યા છે. મજબૂત લેબર માર્કેટને કારણે યુએસ ફેડરલ રિઝર્વ દ્વારા વ્યાજદરમાં વહેલી તકે વધારો કરવાની શક્યતાઓ પ્રબળ બની છે. સામાન્ય રીતે, વ્યાજદરમાં વધારો શેરબજાર માટે નકારાત્મક માનવામાં આવે છે, જેની અસર ભારતીય બજાર પર જોવા મળી રહી છે.