શેરબજારમાં તેજી: સેન્સેક્સ 75,600 અને નિફ્ટી 23,700ને પાર

શેરબજારમાં તેજી: સેન્સેક્સ 75,600 અને નિફ્ટી 23,700ને પાર

ભારતીય શેરબજાર માટે આજનો દિવસ રોકાણકારો માટે ખુશીના સમાચાર લઈને આવ્યો છે. સપ્તાહના કારોબારી દિવસે સ્થાનિક શેરબજાર મજબૂત ગ્રીન ઝોનમાં (લીલા નિશાન સાથે) વેપાર કરી રહ્યું છે. વૈશ્વિક બજારોના મિશ્ર સંકેતો વચ્ચે ભારતીય શેરબજારના બંને મુખ્ય ઇન્ડેક્સ સેન્સેક્સ અને નિફ્ટીમાં શાનદાર ઉછાળો જોવા મળી રહ્યો છે.

સેન્સેક્સ અને નિફ્ટીમાં જોરદાર ઉછાળો

બજારમાં સવારથી જ ખરીદીનો માહોલ જામ્યો છે. બોમ્બે સ્ટોક એક્સચેન્જનો સેન્સેક્સ હાલમાં 290 પોઇન્ટના વધારા સાથે 75,612ની ઐતિહાસિક સપાટીએ ટ્રેડ થઈ રહ્યો છે. નેશનલ સ્ટોક એક્સચેન્જનો નિફ્ટી પણ 100 પોઇન્ટ ઊંચકાઇને 23,759ની મજબૂત સપાટી પર પહોંચી ગયો છે.

આ સેક્ટર્સના શેરોમાં ધૂમ ખરીદી

આજના કારોબારમાં ચોતરફ ખરીદીનો માહોલ જોવા મળી રહ્યો છે. ખાસ કરીને રિયલ્ટી, પીએસયુ બેંક, ઉર્જા  અને ઇન્ફ્રાસ્ટ્રક્ચર ક્ષેત્રની કંપનીઓના શેરોમાં રોકાણકારો વ્યાપક ખરીદી કરી રહ્યા છે, જેના કારણે બજારને મોટો સપોર્ટ મળી રહ્યો છે.

ક્રૂડ ઓઇલ 100 ડોલરની નજીક

બીજી તરફ આંતરરાષ્ટ્રીય બજારમાં કાચા તેલની કિંમતોમાં પણ તેજી જોવા મળી રહી છે. વૈશ્વિક સ્તરે ક્રૂડ ઓઇલના ભાવ વધીને પ્રતિ બેરલ 99 ડોલરની સપાટીએ પહોંચી ગયા છે, જેની અસર આગામી સમયમાં સ્થાનિક બજાર પર જોવા મળી શકે છે.

સોના-ચાંદીના ભાવમાં ઘટાડો: ખરીદદારો માટે સોનેરી તક

શેરબજારમાં તેજી વચ્ચે કિંમતી ધાતુઓના ભાવમાં સામાન્ય નરમાઈ જોવા મળી રહી છે. સોના અને ચાંદીના બજારમાં આજે ઘટાડો નોંધાયો છે. સોનામાં સામાન્ય ઘટાડો જોવા મળ્યો છે અને તે હાલ 1 લાખ 59 હજાર રૂપિયા (પ્રતિ 10 ગ્રામ)ના સ્તરે ટ્રેડ થઈ રહ્યું છે. ચાંદીના ભાવમાં મોટો કડાકો બોલાયો છે. ચાંદી 2,000 રૂપિયાના ઘટાડા સાથે 2 લાખ 72 હજાર રૂપિયા પ્રતિ કિલોના ભાવે પહોંચી ગઈ છે.

રોકાણકારો માટે અત્યારે શેરબજારમાં કમાણીની ઉત્તમ તક દેખાઈ રહી છે, જ્યારે સોના-ચાંદીમાં આવેલા ઘટાડાથી સામાન્ય ગ્રાહકોને થોડી રાહત મળી છે.