સલમાન ખાન ફાયરિંગ કેસમાં લોરેન્સ બિશ્નોઈ અને તેનો ભાઈ અનમોલ 'વોન્ટેડ આરોપી' જાહેર

મુંબઈ પોલીસે બોલિવૂડ અભિનેતા સલમાન ખાનના ઘરની બહાર ફાયરિંગની ઘટનામાં જેલમાં બંધ ગેંગસ્ટર લોરેન્સ બિશ્નોઈ અને તેના નાના ભાઈ અનમોલ બિશ્નોઈને 'વોન્ટેડ આરોપી' જાહેર કર્યા છે. એક અધિકારીએ શનિવારે (20 એપ્રિલ) આ માહિતી આપી હતી. અધિકારીએ જણાવ્યું કે આ અઠવાડિયાની શરૂઆતમાં આ કેસમાં ધરપકડ કરાયેલા વિકી ગુપ્તા અને સાગર પાલને કથિત રીતે બિશ્નોઈ ભાઈઓ પાસેથી સૂચનાઓ મળી રહી હતી.

અધિકારીએ જણાવ્યું કે લોરેન્સ બિશ્નોઈ અન્ય કેસમાં ગુજરાતની સાબરમતી સેન્ટ્રલ જેલમાં બંધ છે, પરંતુ તેનો ભાઈ કેનેડા અથવા અમેરિકામાં હોવાનું માનવામાં આવે છે. તેમણે કહ્યું કે મુંબઈ પોલીસ ટૂંક સમયમાં લોરેન્સની કસ્ટડી માંગી શકે છે. લોરેન્સ બિશ્નોઈના ભાઈ અનમોલે સોશિયલ મીડિયા પોસ્ટ દ્વારા સલમાનના ઘર પર થયેલા હુમલાની જવાબદારી લીધી હતી. તેણે હુમલાને માત્ર ટ્રેલર ગણાવ્યો હતો.

સલમાનના ઘર પર હુમલો કરનારાઓની ભુજમાંથી ધરપકડ

14 એપ્રિલની સવારે સલમાન ખાનના બાંદ્રા સ્થિત 'ગેલેક્સી એપાર્ટમેન્ટ' પર બે મોટરસાઇકલ સવારોએ ગોળીબાર કર્યા બાદ પોલીસે IPCની કલમ 307 (હત્યાનો પ્રયાસ) હેઠળ FIR નોંધી હતી. 16 એપ્રિલે પોલીસે ગુજરાતના ભુજમાંથી વિકી ગુપ્તા અને સાગર પાલની ધરપકડ કરી હતી. અધિકારીઓએ દાવો કર્યો હતો કે ગુપ્તા મોટરસાઇકલ પર સવાર હતો ત્યારે પાલે કથિત રીતે ગોળીબાર કર્યો હતો.