સોનમ કપૂર બાદ નેહા ધૂપિયાના પ્રભુતામાં પગલા, અંગદ બેદી સાથે કર્યા લગ્ન

બોલિવૂડ અભિનેત્રી સોનમ કપૂર બાદ નેહા ધૂપિયાએ પણ લગ્ન કરી લીધા છે. નેહાએ ભારતના પૂર્વ ક્રિકેટર બિશન સિંહ બેદીના પુત્ર અંગદ બેદી સાથે લગ્ન કર્યા છે. નેહા અને અંગદે તેમના લગ્નનો ખુલાસો ઇન્સ્ટાગ્રામ પર કર્યો છે.

નેહા ધૂપિયાએ તસવીર શેર કરીને લખ્યું કે, 'મારા જીવનનો શ્રેષ્ઠ નિર્ણય. આજે મેં મારા બેસ્ટ ફ્રેન્ડ સાથે લગ્ન કરી લીધા છે. મારા હસબન્ડ સાથેનો ફોટો'

અંગદ બેદી ક્રિકેટર બિશન સિંહ બેદીનો પુત્ર છે અને અમિતાભ બચ્ચન સાથે પિંક ફિલ્મમાં નજરે પડ્યો હતો. સોનમ કપૂરની જેમ નેહા ધૂપિયાએ પણ પંજાબી વિધિથી લગ્ન કર્યા છે.

નેહા ધૂપિયાનો જન્મ 27 ઓગસ્ટ, 1980ના રોજ થયો હતો. નેહાએ બોલિવૂડ ઉપરાંત તેલુગુ અને મલયાલમ ફિલ્મોમાં કામ કર્યું છે. તેણે એક્ટિંગમાં ડેબ્યૂ સ્ટેજ પ્લેથી કર્યું હતું. વર્ષ 2003માં તેમણે બોલિવુડમાં કયામત ફિલ્મથી એન્ટ્રી કરી હતી.

નેહા ધૂપિયાનું ફિલ્મી કરિયર

નેહાએ અત્યાર સુધીમાં કયામત, વિલન, જૂલી, શીશા, ક્યા કૂલ હૈ હમ, ગરમ મસાલા, હે બેબી, સિંહ ઈસ કિંગ, રશ, હિન્દી મીડિયમ, તુમ્હારી સુલુ જેવી ફિલ્મોમાં કામ કર્યું છે.

આ ઉપરાંત નેહા ધૂપિયાએ કોમેડી સર્કસ, નૌટંકી-ધ કોમેડી થિયેટર, એમટીવી રોડિઝ, છોટે મિયાં ધાકડ જેવા ટેલિવિઝન શોમાં હોસ્ટ, જજ તરીકે પણ કામ કર્યું છે.

અંકિત ચૌહાણ, સોશિયલ મીડિયા ડેસ્ક