કેન્દ્રીય ગૃહ મંત્રી અમિત શાહનો અમદાવાદ અને ગાંધીનગરમાં ધુંઆધાર પ્રચાર

ગાંધીનગરથી ભાજપ ઉમેદવાર અને કેન્દ્રીય ગૃહમંત્રી અમિત શાહે પ્રચારના શ્રીગણેશ કર્યા છે. અમદાવાદ જિલ્લાના સાણંદ અને ગાંધીનગર કલોલમાં તેમણે જંગી રોડ શૉ યોજ્યો હતો. સૌથી પહેલા અમિત શાહ સાણંદ પહોંચ્યા હતા..અહીં તેમનું સ્વાગત કરવામાં આવ્યું હતું. જ્યારબાદ સાણંદ એપીએમસી માર્કેટ પાસેથી અમિત શાહનો રોડ શૉ શરૂ થયો હતો.

જે મુખ્ય બજાર, બસ સ્ટેશન પરથી પસાર થઈ નળ સરોવર રોડ ખાતે પૂર્ણ થય હતો. રસ્તાની બંને બાજુ અમિત શાહને આવકારવા માટે લોકોની ભીડ ઉમટી હતી. સાણંદમાં રોડ શૉ પૂર્ણ કર્યા બાદ અમિત શાહ ગાંધીનગરના કલોલ પહોંચ્યા હતા. અહી જે.પી. ગેટ પરથી રોડ શૉની શરૂઆત થઈ હતી.

બાદમાં રોડ શૉ ડો. બાબા સાહેબ આંબેડકરની પ્રતિમા, ભવાની નગર ચાલી, ખૂની બંગલા તળાવ સહિતના વિસ્તારમાંથી પસાર થઈ ટાવર ચોક ખાતે પૂર્ણ થયો હતો. રોડ શૉમાં અમિત શાહની સાથે પૂર્વ નાયબ મુખ્યમંત્રી નીતિન પટેલ પણ જોવા મળ્યા હતા. કલોલ બાદ અમિત શાહ સાંજે અમદાવાદના રાણીપથી જીવરાજ પાર્ક સુધી રોડ શૉ કરશે. મોડી રાત્રે અમિત શાહ અમદાવાદના વેજલપુરમાં જાહેરસભા પણ સંબોધશે. આવતીકાલે ફોર્મ ભરવાનો અંતિમ દિવસ છે ત્યારે અમિત શાહ આવતીકાલે ગાંધીનગરથી ઉમેદવારી ફોર્મ ભરશે.

તેમનો ત્રીજો રોડ શો અમદાવાદ શહેરના અગ્રણી વિસ્તારોને આવરી લેશે જે ગાંધીનગર લોકસભા મતવિસ્તારના ભાગ છે. તેઓ અમદાવાદના વેજલપુર વિસ્તારમાં એક ચૂંટણી રેલીને સંબોધવાના છે. બીજેપી નેતા અનુરાગ ઠાકુર પણ આજે ગુજરાતમાં પાર્ટી માટે પ્રચાર કરશે. તેઓ આજે જામનગર શહેરમાં રોડ શો કરશે અને રેલીને સંબોધશે.