ગુજરાતની 6 બેઠકો માટેની પેટાચૂંટણીનો પ્રચાર પૂરજોશમાં

CM રૂપાણીએ મહિસાગરમાં, પરેશ ધાનાણીએ બનાસકાંઠામાં સભા ગજવી

છ વિધાનસભાની પેટાચૂંટણીને લઈ રાજ્યમાં ચૂંટણીનો માહોલ જામ્યો છે. વિધાનસભાની બેઠકો જીતવા માટે ભાજપ-કોંગ્રેસ એડીચોટીનું જોર લગાવી રહી છે. ત્યારે રાજ્યના મુખ્યમંત્રી વિજય રૂપાણીએ મહિસાગરના લુણાવાડા ખાતે સભા સંબોધી ભાજપને જીતાડવા માટે અપીલ કરી હતી. આ ઉપરાંત મુખ્યમંત્રીએ કલમ 370ને નાબૂદ કરવા માટેના આંદોલનમાં શ્યામાપ્રસાદ મુખર્જીના સાથી લુણાવાડાના ઉમાશંકર બેરિસ્ટરને તેમના અમૂલ્ય યોગદાન બદલ યાદ કર્યા હતા.તો વિવિધ મુ્દ્દાઓને લઈને કોંગ્રેસ પર આકરા પ્રહાર કર્યા હતા. આ પ્રસંગે લુણાવાડા નગરપાલિકાના પૂર્વ પ્રમુખ અને પૂર્વ મંત્રી ગુજરાત પ્રદેશ મહિલા કોંગ્રેસ જયશ્રીબેન જોશી મુખ્યમંત્રીની ઉપસ્થિતિમાં ભાજપમાં જોડાયા હતા. આ ઉપરાંત એનસીપીના ગુજરાતના યુવા પ્રમુખ વિરેન્દ્ર પટેલ, લુણાવાડા નગરપાલિકાના પૂર્વ કોંગ્રેસના સભ્ય અને લુણાવાડા એપીએમસીના સભ્ય શાંતિભાઈ પટેલે પણ ભાજપનો ખેસ ધારણ કર્યો હતો.