ગુજરાતમાં ગરમીથી આંશિક રાહતની આશા: આગામી સાત દિવસ હવામાન સૂકું રહેશે

ગુજરાતમાં ગરમીથી આંશિક રાહતની આશા: આગામી સાત દિવસ હવામાન સૂકું રહેશે, તાપમાનમાં 2થી 3 ડિગ્રીના ઘટાડાની શક્યતા

ગુજરાતભરમાં કાળઝાળ ગરમી અને અસહ્ય અકળામણ વચ્ચે હવામાન વિભાગ તરફથી રાહતના સમાચાર સામે આવ્યા છે. આગામી સાત દિવસ એટલે કે 19 મેથી 25 મે દરમિયાન રાજ્યભરમાં હવામાન મુખ્યત્વે સૂકું રહેવાની સંભાવના છે. જો કે, આગામી 24 કલાક બાદ રાજ્યના મોટાભાગના વિસ્તારોમાં ગરમીના પારો નીચે ઉતરે તેવી શક્યતા વર્તાવવામાં આવી રહી છે.

તાપમાનમાં 2થી 3 ડિગ્રીનો ઘટાડો થશે

હવામાન વિભાગ (IMD) ની આગાહી અનુસાર, આગામી 24 કલાક દરમિયાન રાજ્યના મહત્તમ તાપમાનમાં કોઈ મોટો ફેરફાર જોવા નહીં મળે. પરંતુ, ત્યારબાદ તાપમાનમાં ધીમે-ધીમે 2થી 3 ડિગ્રી સેલ્સિયસનો ઘટાડો થઈ શકે છે. આ ઘટાડાને પગલે રાજ્યના કેટલાક વિસ્તારોમાં મહત્તમ તાપમાન 40 ડિગ્રીની આસપાસ નોંધાઈ શકે છે, જેનાથી નાગરિકોને કાળઝાળ ગરમીમાંથી થોડીક રાહત મળશે.

આજે અમદાવાદમાં કેવું રહેશે હવામાન?

અમદાવાદ અને તેની આસપાસના વિસ્તારોમાં આજે પણ આકાશ મુખ્યત્વે ચોખ્ખું રહેશે. શહેરમાં ગરમીનો પ્રકોપ યથાવત રહેશે અને મહત્તમ તાપમાન 43 ડિગ્રી સેલ્સિયસની આસપાસ રહેવાની સંભાવના છે. બપોરના સમયે લોકોને બિનજરૂરી બહાર ન નીકળવા અને પૂરતા પ્રમાણમાં પ્રવાહી લેવા માટે તબીબો દ્વારા સલાહ આપવામાં આવી રહી છે. હવામાન વિભાગના મતે આગામી બે દિવસ બાદ જ તાપમાનમાં સાચો ઘટાડો અનુભવાશે.