જામનગરના વાયુ પ્રદૂષણ સામે લડવા 20 કરોડ રૂ.ની ગ્રાન્ટ મંજૂર

જામનગરના વાયુ પ્રદૂષણ સામે લડવા 20 કરોડ રૂ.ની ગ્રાન્ટ મંજૂર

શહેરના વાયુ પ્રદૂષણની પ્રતિકૂળ અસરોનો સામનો કરવા અને હવાની ગુણવત્તા સુધારવા માટે જામનગર મહાનગરપાલિકાને ગુજરાત મ્યુનિસિપલ ફાઇનાન્સ બોર્ડ તરફથી રૂ 20કરોડની ગ્રાન્ટ ફાળવવામાં આવી છે. જામનગરના મેયર વિનોદભાઈ ખીમસૂર્યાએ પત્રકારોને આ અંગેની માહિતી આપી હતી.

નેશનલ ક્લીન એર પ્રોગ્રામ (NCAP) હેઠળ સહાય

ભારત સરકારના શહેરી વિકાસ અને શહેરી ગૃહ નિર્માણ વિભાગના માર્ગદર્શન હેઠળ આ ગ્રાન્ટ મંજૂર કરવામાં આવી છે. આ ગ્રાન્ટ "જામનગર સિટી ક્લીન એર એક્શન પ્લાન" ના અમલ માટે આપવામાં આવી છે.

કેન્દ્રીય પર્યાવરણ, વન અને આબોહવા પરિવર્તન મંત્રાલય (MoEF&CC) દ્વારા વર્ષ 2019માં "નેશનલ ક્લીન એર પ્રોગ્રામ" (NCAP) શરૂ કરવામાં આવ્યો હતો. NCAP નો મુખ્ય હેતુ વર્ષ 2026 સુધીમાં હવાના PM10 અને PM2.5 સ્તરોમાં 40% જેટલો ઘટાડો હાંસલ કરવાનો છે.

રાજ્ય સ્તરીય જોડાણ: NCAP ના તર્જ પર તૈયાર કરાયેલ રાજ્ય સ્વચ્છ હવા એક્શન પ્લાન (SCAP) થકી રાષ્ટ્રીય પ્રયાસોને પુરક બનાવવા માટે જામનગર મહાનગરપાલિકાને આ નાણાકીય સહાય પૂરી પાડવામાં આવી છે.

આ 20 કરોડની ગ્રાન્ટ જામનગર શહેરમાં વાયુ પ્રદૂષણ નિયંત્રણ, રોડની ધૂળ ઘટાડવા અને અન્ય પર્યાવરણીય સુધારાઓ સંબંધિત પ્રોજેક્ટ્સને વેગ આપશે, જેનાથી શહેરના રહેવાસીઓને સ્વચ્છ હવા મળી શકશે.