ટેકનોલોજી સાથે સંસ્કારનો સમન્વય: અમદાવાદની VGEC કોલેજના વિદ્યાર્થીઓએ સ્ટ્રેસ દૂર કરવા શરૂ કર્યું ‘ભજન ક્લબિંગ’

ટેકનોલોજી સાથે સંસ્કારનો સમન્વય: અમદાવાદની VGEC કોલેજના વિદ્યાર્થીઓએ સ્ટ્રેસ દૂર કરવા શરૂ કર્યું ‘ભજન ક્લબિંગ’

આજના ડિજિટલ યુગમાં જ્યાં એન્જિનિયરિંગના વિદ્યાર્થીઓ સતત કોડિંગ, પ્રોજેક્ટ્સ અને પ્લેસમેન્ટના અતિશય તણાવ નીચે જીવતા હોય છે, ત્યારે અમદાવાદની વિશ્વકર્મા ગવર્મેન્ટ એન્જિનિયરિંગ કોલેજ (VGEC) ના વિદ્યાર્થીઓએ માનસિક શાંતિ મેળવવા માટે એક અદ્ભુત અને અનોખો પ્રયોગ શરૂ કર્યો છે. કોલેજના યુવાનોએ કેમ્પસમાં ‘ભજન ક્લબિંગ’ ની શરૂઆત કરી છે, જે હાલ સમગ્ર શૈક્ષણિક જગતમાં ભારે પ્રશંસા પામી રહ્યું છે.

પ્રધાનમંત્રી નરેન્દ્ર મોદીના લોકપ્રિય કાર્યક્રમ ‘મન કી બાત’ માંથી પ્રેરણા મેળવીને શરૂ કરાયેલી આ પહેલ યુવાનોને ડિજિટલ દુનિયાના વળગણથી દૂર કરી પરસ્પર સામાજિક રીતે જોડવાનું એક સચોટ માધ્યમ બની છે.

પરંપરાગત ભજનોને મળ્યો આધુનિક સંગીતનો સથવારો

એન્જિનિયરિંગની દોડધામ અને કરિયરની આંધળી દોટ વચ્ચે VGEC કોલેજના વિદ્યાર્થીઓએ પરંપરાગત ભજનોને આધુનિક સંગીતના વાજિંત્રો સાથે નવી શૈલીમાં રજૂ કરીને કેમ્પસમાં એક નવી જ ઊર્જા ભરી દીધી છે. કોલેજના વિદ્યાર્થી નિહાર જગતિયાએ જણાવ્યું કે, આ નવતર પ્રયોગના કારણે યુવાનો સોશિયલ મીડિયા અને રીલ્સની દુનિયામાંથી બહાર આવીને સાચી મિત્રતા અને માનસિક હળવાશનો અસલી આનંદ માણી રહ્યા છે. આ પ્રવૃત્તિથી વિદ્યાર્થીઓની એકાગ્રતા (Focus) વધી છે અને માતૃભાષા ગુજરાતી પ્રત્યેનો તેમનો લગાવ પણ વધુ દ્રઢ બન્યો છે.

કોલેજ પ્રશાસનનો પૂર્ણ સહકાર: શિક્ષણ સાથે સંસ્કૃતિનું જોડાણ

નવી શિક્ષણ નીતિ (NEP) ના આદર્શોને સાર્થક કરતી આ પ્રવૃત્તિને કોલેજ પ્રશાસન તરફથી પણ બિરદાવવામાં આવી છે અને તેને શિક્ષણના એક સકારાત્મક ભાગ તરીકે પ્રોત્સાહન અપાઈ રહ્યું છે.

પ્રોફેસર અમી યુ. છાયાના જણાવ્યા અનુસાર, સામૂહિક ગાયનના કારણે વિદ્યાર્થીઓનો એકેડેમિક તણાવ ખૂબ ઓછો થયો છે. તેનાથી તેમની યાદશક્તિ અને ભાષાકીય ક્ષમતામાં મોટો સુધારો જોવા મળ્યો છે.

આચાર્ય વિનય પુરાણી એ આ પહેલને બિરદાવતા ઉમેર્યું કે, આ પ્રવૃત્તિ યુવાનોને માત્ર આધુનિક ટેક્નોલોજી જ નહીં, પરંતુ ભારતીય સંસ્કૃતિના અમૂલ્ય વારસા, પરસ્પર ભાઈચારો અને ટીમવર્ક (સાથે મળીને કામ કરવું) ના ઉત્તમ ગુણો પણ શીખવે છે.

કેમ્પસના એક સામાન્ય વિચારમાંથી બની મોટી ઓળખ

કોલેજ કેમ્પસના એક સામાન્ય વિચારમાંથી શરૂ થયેલું આ ‘ભજન ક્લબિંગ’ આજે વિશ્વકર્મા ગવર્મેન્ટ એન્જિનિયરિંગ કોલેજની એક આગવી અને અનોખી ઓળખ બની ગયું છે. કોડિંગ લેબના કમ્પ્યુટર સ્ક્રીનની સામે કલાકો વિતાવતા આ યુવાનોએ સાબિત કરી બતાવ્યું છે કે, સાચી સફળતા માત્ર સારા માર્ક્સ કે પેકેજ મેળવવામાં નહીં, પરંતુ મનની શાંતિ અને જીવનના સંતુલનમાં રહેલી છે.