પંચમહાલની વાવકુલ્લી-2 ગ્રામ પંચાયતને દેશની શ્રેષ્ઠ “સુશાસન યુક્ત પંચાયત” નો એવોર્ડ

પંચમહાલ જિલ્લાની વાવકુલ્લી-2 ગ્રામ પંચાયતને નેશનલ પંચાયત એવોર્ડ-2024માં દેશની સર્વશ્રેષ્ઠ “સુશાસન યુક્ત પંચાયત” તરીકે પસંદ કરવામાં આવી છે. રાષ્ટ્રપતિ દ્રૌપદી મુર્મુના હસ્તે આ એવોર્ડ અને રૂ. 1 કરોડની રકમ એનાયત કરવામાં આવી છે.

દેશની અંદાજે 1.94 લાખ ગ્રામ પંચાયતના નોમીનેશન પૈકી ‘નેશનલ પંચાયત એવોર્ડ-2024’માં પંચમહાલ જિલ્લાની ઘોઘંબા તાલુકાની વાવકુલ્લી-2 દેશની સર્વશ્રેષ્ઠ “સુશાસન યુક્ત પંચાયત” તરીકે પસંદગી કરવામાં આવી છે. રાષ્ટ્રપતિ દ્રૌપદી મુર્મુના હસ્તે એવોર્ડ એનાયત કરી પ્રથમ પુરસ્કાર તરીકે રૂ. 1 કરોડની રકમ ગ્રામ પંચાયતને આપવામાં આવી છે. ભારત સરકાર દ્વારા નેશનલ પંચાયત એવોર્ડ 2024-25 અંતર્ગત દિન દયાલ ઉપાધ્યાય પંચાયત સતત વિકાસ પુરસ્કાર આપવામાં આવે છે. આ એવોર્ડમાં કુલ 9 થીમ આધારીત દરેક થીમમાંથી ત્રણ એવોર્ડ આપવામાં આવે છે. જેમાં પ્રથમ પુરસ્કાર માટે રૂ. 1 કરોડ, બીજા પુરસ્કાર માટે રૂ. 75 લાખ અને ત્રીજા પુરસ્કાર માટે રૂ 50 લાખની રકમ એવોર્ડ તરીકે એનાયત કરવામાં આવે છે. દેશની 45 એવોર્ડ વિજેતા પંચાયતોને ડિજિટલ ટ્રાન્સફર દ્વારા કુલ રૂપિયા 46 કરોડની રકમ એનાયત કરવામાં આવી છે. નવી દિલ્લી ખાતે યોજાયેલ આ એવોર્ડ ગુજરાત સરકાર વતી અધિક વિકાસ કમિશનર ગૌરવ દહિયા, અને નેશનલ પંચાયત નોડલ અધિકારી  દ્વારા એવોર્ડ સ્વીકારવામાં આવ્યો હતો.