રાજ્યમાં મંત્રીઓ સાથે પરામર્શ કરવા વિવિધ 13 સ્થાયી પરામર્શ સમિતિઓની રચના કરાઈ

રાજ્યના તમામ ધારાસભ્યો અને સંસદ સભ્યોનો પરામર્શ સમિતિમાં સમાવેશ 

રાજયમાં મંત્રીઓને પોતાના વહીવટી ક્ષેત્રમાં નીતિના અમલ સંબંધિત બાબતોમાં વિચાર-વિનિમય કરવા મુખ્યમંત્રી સહિત કેબિનેટ કક્ષાના મંત્રીઓ તેમજ સ્વતંત્ર હવાલો ધરાવતા રાજ્યકક્ષાના મંત્રીઓના અધ્યક્ષપણા હેઠળ ધારાસભ્યોની 13 સ્થાયી પરામર્શ સમિતિઓની રચના કરવાનો રાજ્ય સરકારે નિર્ણય કર્યો છે. આ સમિતિઓમાં રાજયના સંસદ સભ્યોને આમંત્રિત સભ્ય તરીકે સમાવવામાં આવ્યા છે. પ્રથમ સમિતિમાં મુખ્યમંત્રી ભૂપેન્દ્ર પટેલ સહિત 16 મંત્રી-ધારાસભ્યો તેમજ આમંત્રિત સભ્ય તરીકે ત્રણ સંસદ, બીજી સમિતિમાં નાયબ મુખ્યમંત્રી હર્ષ સંઘવી સહિત 18 મંત્રી-ધારાસભ્યો તથા ત્રણ સંસદ સભ્યો, ત્રીજી સમિતિમાં નાણા મંત્રી કનુ દેસાઈ સહિત 15 મંત્રી-ધારાસભ્યો સહિત ત્રણ સંસદ સભ્યો ચોથી સમિતિમાં કૃષિ મંત્રી જીતુ વાઘાણી સહિત 16 મંત્રી-ધારાસભ્યો સહિત ત્રણ સંસદ સભ્યો, પાંચમી સમિતિમાં ઊર્જા મંત્રી ઋષિકેશ પટેલ સહિત 15 મંત્રી-ધારાસભ્યો અને ત્રણ સંસદ સભ્યો, છઠ્ઠી સમિતિમાં શ્રમ અને કૌશલ્ય વિકાસ મંત્રી કુંવરજી બાવળિયા સહિત 15 મંત્રી-ધારાસભ્યો અને બે સંસદ સભ્યો તેમજ સાતમી સમિતિમાં આદિજાતિ વિકાસ મંત્રી નરેશ પટેલ સહિત 15 મંત્રી-ધારાસભ્યો આમંત્રિત સભ્ય તરીકે સમાવેશ કરાયો છે.

આ પરામર્શ સમિતિઓના કાર્યક્ષેત્રમાં દરેક પરામર્શ સમિતિ હાલ તુરંત વર્તમાન મંત્રીમંડળની મુદત સુધી કાર્ય કરશે. દર ત્રણ મહિને એકવાર અથવા મંત્રી નકકી કરે તેમ વારંવાર મળતી સમિતિની બેઠકોમાં મંત્રી પ્રમુખ તરીકેનું સ્થાન સંભાળશે અને સંબંધિત રાજયકક્ષાના મંત્રી પણ બેઠકમાં હાજરી આપશે. મંત્રી જે વહીવટી ક્ષેત્ર સાથે સંકળાયેલા હોય તેમાંની નીતિના અમલ, વ્યાપક મહત્વની બાબતોના પ્રશ્નો તેમજ નાગરિકોને લગતા પ્રશ્નો અંગે સમિતિ તેમની સાથે પરામર્શ કરશે. મંત્રી પોતે સમિતિ સમક્ષ રજૂ કરે તેવી અથવા કોઇ સભ્ય સમિતિ સમક્ષ રજૂ કરવા મંત્રીને વિનંતી કર્યાથી મંત્રી રજૂ કરે તેવી બાબતો અંગે સમિતિ વિચારણા કરશે. 

સમિતિ વ્યક્તિગત અધિકારીઓની અંગત, નોકરી અંગેની બાબતોને લગતા કોઇ પ્રશ્નો, હાલના નિયમો અને હુકમો અનુસાર સંબંધિત અધિકારીશ્રીઓ જેનો નિકાલ કરી શકે તેવા વ્યક્તિગત કોઇ કેસ અથવા ન્યાયિક કાર્યવાહીમાં વિચારાધિન હોય તેવા અથવા જેને અંગે પક્ષકાર કોર્ટમાં અથવા તે અંગે નિર્ણય લઇ શકે તેવી સત્તા ધરાવતા બીજા પ્રાધિકારોને અરજી કરી શકે તેવી બાબતો વિચારણામાં લેશે નહિ. પરામર્શ સમિતિઓનું મુખ્ય મથક ગાંધીનગર રહેશે તેમ, વૈધાનિક અને સંસદીય બાબતોના વિભાગની યાદીમાં જણાવાયું છે.