જાંબુડિયા–પાનેલી ખાતે બનશે ઇન્ટિગ્રેટેડ સિરામિક પાર્ક

મોરબીથી વૈશ્વિક બજારો સુધી: VGRC રાજકોટ ખાતે એડવાન્સ્ડ સિરામિક્સમાં વ્યૂહાત્મક રોકાણની તકો

ગુજરાતના ઔદ્યોગિક વિકાસમાં એક મહત્વપૂર્ણ પ્રકરણ ઉમેરાવા જઈ રહ્યું છે. જાંબુડિયા–પાનેલી ખાતે ગુજરાત ઔદ્યોગિક વિકાસ નિગમ (GIDC) દ્વારા આગામી સમયમાં ઇન્ટિગ્રેટેડ સિરામિક પાર્ક વિકસાવવામાં આવશે. આ પહેલને રાજ્યના ઔદ્યોગિક ઇતિહાસમાં સીમાચિહ્નરૂપ ગણવામાં આવી રહી છે. આ પ્રોજેક્ટ વડાપ્રધાન નરેન્દ્ર મોદીના “વિકસિત ગુજરાતથી વિકસિત ભારત”ના વિઝનને સાકાર કરતી દિશામાં એક મહત્વપૂર્ણ પગલું છે.

1050 એકરમાં ફેલાયેલો વ્યૂહાત્મક ઔદ્યોગિક પાર્ક

મોરબી–રાજકોટ ઔદ્યોગિક પટ્ટામાં સ્થિત જાંબુડિયા–પાનેલી ખાતે વિકસિત થનારો આ ઇન્ટિગ્રેટેડ સિરામિક પાર્ક આશરે 1050 એકર વિસ્તારમાં ફેલાયેલો હશે. વિશ્વવિખ્યાત મોરબી સિરામિક ક્લસ્ટરની નજીકતા હોવાને કારણે પાર્કને મજબૂત અને પહેલેથી જ સ્થાપિત ઔદ્યોગિક ઇકોસિસ્ટમનો વિશેષ લાભ મળશે.

સિરામિક ઉદ્યોગની મૂલ્ય શૃંખલામાં વિસ્તરણ

આ મહત્વાકાંક્ષી પ્રોજેક્ટ સિરામિક ઉદ્યોગની સમગ્ર મૂલ્ય શૃંખલાને આવરી લે તે રીતે રચાયો છે. અહીં ટાઇલ્સ અને સેનિટરીવેર ઉત્પાદન પર મુખ્ય ધ્યાન કેન્દ્રિત કરવામાં આવશે, સાથે જ ઔદ્યોગિક અને એડવાન્સ્ડ સિરામિક્સ જેવા ઉચ્ચ મૂલ્યવાળા અને વિશિષ્ટ સેગમેન્ટ્સમાં નવા રોકાણોને પ્રોત્સાહન મળશે. પરિણામે, ગુજરાતનું સ્થાન વૈશ્વિક સિરામિક ઉત્પાદન નકશા પર વધુ મજબૂત બનશે.

લોજિસ્ટિક્સ અને કનેક્ટિવિટીનો મોટો લાભ

જાંબુડિયા–પાનેલી સિરામિક પાર્કને ઉત્તમ લોજિસ્ટિક્સ અને કનેક્ટિવિટી ઉપલબ્ધ રહેશે. રાષ્ટ્રીય ધોરીમાર્ગ NH-27 માત્ર 1.5 કિમી દૂર છે, મોરબી રેલ્વે સ્ટેશન 12 કિમી અંતરે આવેલું છે. રાજકોટનું હિરાસર આંતરરાષ્ટ્રીય એરપોર્ટ આશરે 70 કિમી અને મકનસર ખાતેનું ઇનલેન્ડ કન્ટેનર ડેપો માત્ર 5 કિમી દૂર છે. નવલખી, કંડલા અને મુન્દ્રા જેવા મુખ્ય બંદરોની નજીકતા નિકાસ આધારિત ઉદ્યોગો માટે વિશેષ લાભરૂપ રહેશે.

વિશિષ્ટ ઇન્ફ્રાસ્ટ્રક્ચર અને આધુનિક સુવિધાઓ

આ ઇન્ટિગ્રેટેડ સિરામિક પાર્કમાં ઉદ્યોગોની જરૂરિયાતોને અનુરૂપ વિશિષ્ટ ઇન્ફ્રાસ્ટ્રક્ચર વિકસાવવામાં આવશે. તેમાં કોમન ડિસ્પ્લે સેન્ટર, NABL-પ્રમાણિત પ્રયોગશાળા સાથેનું સેન્ટર ઓફ એક્સેલન્સ, તેમજ કૌશલ્ય વિકાસ કેન્દ્રનો સમાવેશ થાય છે.
ઉદ્યોગોની વધતી માંગને ધ્યાનમાં રાખીને 30 MLD ક્ષમતાવાળી સમર્પિત પાણી પુરવઠા વ્યવસ્થા, બે 66 KV અને એક 220 KV સબસ્ટેશન સહિત મજબૂત વીજ પુરવઠા માળખું વિકસાવવામાં આવશે. પર્યાવરણ સંરક્ષણ માટે STP અને ઘન કચરા વ્યવસ્થાપન સુવિધાઓ પણ ઉપલબ્ધ રહેશે.

VGRC રાજકોટ: રોકાણ અને વિકાસ માટે સશક્ત મંચ

11 અને 12 જાન્યુઆરી 2026 દરમિયાન રાજકોટમાં યોજાનારી વાઇબ્રન્ટ ગુજરાત રીજનલ કોન્ફરન્સ (VGRC) કચ્છ અને સૌરાષ્ટ્ર, સિરામિક્સ, લોજિસ્ટિક્સ, બંદરો અને ગ્રીન એનર્જી જેવા ક્ષેત્રોના ઉદ્યોગ અગ્રણીઓને એક મંચ પર લાવશે.
પ્રતિનિધિઓ જાંબુડિયા–પાનેલી સિરામિક પાર્કને ઔદ્યોગિક વિકાસ, ટેકનોલોજી અપગ્રેડેશન અને કૌશલ્ય વૃદ્ધિના મોડલ તરીકે જોઈ રહ્યા છે. મોરબી આસપાસ ઉપલબ્ધ કુશળ માનવ સંસાધન અને રાજ્ય સરકારની પ્રતિબદ્ધતા આ પાર્કને સિરામિક ક્ષેત્રમાં ગુણવત્તા અને ટેક્નોલોજીનું અગ્રણી કેન્દ્ર બનાવશે.