વડોદરામાં ડી.જે. પર ડાન્સ કરતા યુવાનનું હાર્ટ એટેક આવતા મોત

શહેર નજીક આવેલા રણોલી ગામની દીકરીના લગ્નની પૂર્વ રાત્રે ડી.જે.ના તાલે ગરબા-ડાન્સનો કાર્યક્રમ રાખવામાં આવ્યો હતો. આ કાર્યક્રમમાં ડી.જે.ના સંગીત ઉપર ડાન્સ કરી રહેલા ગામના આશાસ્પદ યુવાનને હાર્ટ એટેક આવતા સ્થળ પર મોત નીપજ્યું હતું.

શહેર નજીક આવેલા રણોલી ગામની દીકરીના લગ્નની પૂર્વ રાત્રે ડી.જે.ના તાલે ગરબા-ડાન્સનો કાર્યક્રમ રાખવામાં આવ્યો હતો. આ કાર્યક્રમમાં ડી.જે.ના સંગીત ઉપર ડાન્સ કરી રહેલા ગામના આશાસ્પદ યુવાનને હાર્ટ એટેક આવતા સ્થળ પર મોત નીપજ્યું હતું. ગામમાં ગમગીની ફેલાવી દેનારી આ કરૂણ ઘટના વીડિયોમાં કેદ થઇ ગઇ હતી. ઉલ્લેખનિય છે કે, આ પહેલાં પણ રણોલી ગામના વરરાજાની જાન બોરસદ ગઇ હતી. જ્યાં તેનું બેન્ડવાજાના તાલે ડાન્સ કરતા હાર્ટએટેકથી મોત નીપજ્યું હતું.

મળેલી માહિતી પ્રમાણે રણોલી ગામમાં આવેલી જયંત એગ્રો કંપની સામે આવેલા મહાદેવ મંદિર ફળિયામાં ગુરૂવારે ફળિયામાં યુવતીનું લગ્ન હતું. ગામમાં જાન આવવાની હતી. યુવતીના ઘર આંગણે બે દિવસથી પીઠી, મંડપ મુહૂર્ત, ગ્રહશાંતિ સાથે લગ્નની વિધી શરૂ થઇ ગઇ હતી. બુધવારે રાત્રે યુવતીના ઘર આંગણે જ ડી.જે.ના તાલે ડાન્સ-ગરબાનો કાર્યક્રમ રાખવામાં આવ્યો હતો.

બુધવારે રાત્રે આયોજીત ગરબા-ડાન્સના કાર્યક્રમમાં ફળિયામાં યુવતીના પરિવારજનો તેમજ ફળિયામાં રહેતો વિજય ઉર્ફ રણજીત પગી નામનો યુવાન સહિત અન્ય 3 યુવાનો પોતાના ખભા ઉપર અન્ય યુવાનોને બેસાડીને ગુજરાતી ગીતોના તાલે ડાન્સ કરી રહ્યા હતા.