વલસાડ-ડાંગના સાંસદ ધવલ પટેલ રાષ્ટ્રપતિ સાથે વિદેશ પ્રવાસે જોડાશે

રાષ્ટ્રપતિ દ્રૌપદી મુર્મુ સાથે, પોર્ટુગલ અને સ્લોવેકિયા જનાર પ્રતિનિધિમંડળમાં, લોકસભાના દંડક વલસાડ-ડાંગના સાંસદ ધવલ પટેલનો સમાવેશ

દેશના રાષ્ટ્રપતિ દ્રૌપદી મુર્મુ સાથે, આગામી તા.6 એપ્રિલથી 11મી એપ્રિલ સુધી દેશનું પ્રતિનિધિમંડળ પોર્ટુગલ અને સ્લોવેકીયા જશે, જેમાં કેન્દ્રીય મંત્રી નિમુબેન બાંભણીયા, લોકસભાના દંડક વલસાડ-ડાંગના સાંસદ ધવલ પટેલ અને સંધ્યા રાય દેશનું પ્રતિનિધિત્વ કરશે. આ પ્રવાસમાં બંને દેશો સાથે ભારતના રાજકીય સંબંધો તેમજ પારસ્પરિક વ્યાપારિક સંબંધો વિકસાવવાની ચર્ચા વિચારણા કરાશે. રાષ્ટ્રપતિ અને પ્રતિનિધિ મંડળને રાષ્ટ્રીય સન્માન પણ અપાશે. 

પ્રધાનમંત્રી નરેન્દ્ર મોદીના નેતૃત્વમાં યુવા અને શિક્ષિત સાંસદોને પ્રોત્સાહન આપવામાં આવી રહ્યું છે, જેના ભાગરૂપે પોર્ટુગલ અને સ્લોવેકીયા પ્રવાસમાં વલસાડ-ડાંગના સાંસદ ધવલ પટેલનો સમાવેશ ગૌરવાન્વિત કરનાર સમાચાર છે. થોડા દિવસ અગાઉ સાંસદ ધવલ પટેલે પ્રધાનમંત્રીની મુલાકાત લઈ સાંસદ તરીકે એક વર્ષના કાર્યકાળનો રિપોર્ટ કાર્ડ રજૂ કર્યો હતો.