CM ભૂપેન્દ્ર પટેલની વોશિંગ્ટનમાં વોલમાર્ટના એક્ઝિક્યુટીવ વાઈસ પ્રેસિડેન્ટ સાથે બેઠક

MSME અને કારીગરો માટે વૈશ્વિક તકો વધારવા વોલમાર્ટ સાથે ગુજરાત સરકારની ચર્ચા....VGGS 2027 માટે મુખ્યમંત્રી ભૂપેન્દ્ર પટેલે કર્યો પ્રથમ આંતરરાષ્ટ્રીય રોડ શૉ.

ગુજરાતના મુખ્યમંત્રી ભૂપેન્દ્ર પટેલે તેમના અમેરિકા અને કેનેડાના પ્રવાસ અંતર્ગત વોશિંગટન DCમાં વોલમાર્ટના એક્ઝિક્યુટિવ વાઇસ પ્રેસિડેન્ટ ડેન બ્રાયન્ટ સાથે ખાસ મુલાકાત કરી હતી. આ બેઠકમાં ગુજરાતના વિશાળ MSME સેક્ટરની નિકાસ તકો વધારવા અને ગુણવત્તા સુધારણા અંગે સકારાત્મક ચર્ચાઓ કરવામાં આવી હતી.

ગુજરાતના MSME ઉદ્યોગોને વૈશ્વિક સ્તરે લઈ જવા પરામર્શ

સાન ફ્રાન્સિસ્કોની સફળ મુલાકાત બાદ મુખ્યમંત્રી વોશિંગટન DC પહોંચ્યા હતા. અહીં યોજાયેલી વન-ટુ-વન બેઠકમાં વોલમાર્ટના ગ્લોબલ પબ્લિક પોલિસી એન્ડ ગવર્નમેન્ટ અફેર્સના એક્ઝિક્યુટિવ વાઇસ પ્રેસિડેન્ટ ડેન બ્રાયન્ટ સાથે તેમણે ગુજરાતના MSME ઉદ્યોગોના વિકાસ અંગે ચર્ચા કરી હતી. રાજ્યમાં મોટા પાયે કાર્યરત MSME એકમોને સેન્સિટાઇઝ કરી, તેમની પ્રોડક્ટની ગુણવત્તા વધારીને નિકાસની નવી તકો ઊભી કરવા પર ખાસ ભાર મૂકવામાં આવ્યો હતો.

વોલમાર્ટ દ્વારા 1.15 લાખ એકમોને તાલીમ, 2028 સુધીનો લક્ષ્યાંક નિર્ધારિત

બેઠક દરમિયાન ડેન બ્રાયન્ટે મુખ્યમંત્રીને માહિતી આપતા જણાવ્યું હતું કે, વોલમાર્ટ દ્વારા ચલાવવામાં આવતા ‘વૃદ્ધિ’ કાર્યક્રમ અંતર્ગત વર્ષ 2019 થી અત્યાર સુધીમાં 1.15 લાખથી વધુ MSME એકમોને વિશેષ તાલીમ આપવામાં આવી છે. આટલું જ નહીં, પરંતુ કંપનીએ આગામી વર્ષ 2028 સુધીમાં આ આંકડો વધારીને 1.70 લાખ MSME સુધી પહોંચાડવાનો અને તેમને તાલીમ પૂરી પાડવાનો મહત્વનો લક્ષ્યાંક નક્કી કર્યો છે.

વર્કશોપનું આયોજન અને વાઇબ્રન્ટ સમિટ-2027 માટે રોડમેપ

મુખ્યમંત્રી ભૂપેન્દ્ર પટેલે રાજ્ય સરકારના સંબંધિત વિભાગો અને વોલમાર્ટ સાથે મળીને ભવિષ્યમાં સંયુક્ત વર્કશોપ આયોજિત કરવા અંગે ચર્ચા કરી હતી, જેથી MSME ની સેક્ટરલ સંભાવનાઓને વધુ સારી રીતે ઓળખી શકાય. આગામી 3 થી 4 મહિનામાં નાના કારીગરો અને ઉદ્યોગો માટે વૈશ્વિક તકો શોધવા બંને પક્ષો સાથે મળીને કામ કરશે તેવો નિર્ણય લેવાયો છે. આ ઉપરાંત, આગામી ‘વાઇબ્રન્ટ સમિટ 2027’ દરમિયાન આ અંગે એક સ્પષ્ટ રોડમેપ જાહેર કરવાની દિશામાં પણ ફળદાયી મંત્રણાઓ કરવામાં આવી હતી.

ઉચ્ચ અધિકારીઓની ઉપસ્થિતિ અને ભવિષ્યની અસરો

આ અત્યંત મહત્વપૂર્ણ બેઠકમાં મુખ્યમંત્રીની સાથે મુખ્ય સચિવ એમ.કે. દાસ, નાણાં વિભાગના અધિક મુખ્ય સચિવ ટી. નટરાજન, ઉદ્યોગ વિભાગના અધિક મુખ્ય સચિવ મમતા વર્મા અને મુખ્યમંત્રીના અગ્ર સચિવ સંજીવ કુમાર ખાસ ઉપસ્થિત રહ્યા હતા.